ਕੁਲਦੀਪ ਸਿੰਘ
ਚੰਡੀਗੜ੍ਹ, 11 ਜੁਲਾਈ
ਸ਼ਹਿਰ ਵਿੱਚ ਅੱਜ ਕਰੋਨਾ ਦੇ ਕੁੱਲ 13 ਕੇਸ ਸਾਹਮਣੇ ਆਏ ਤੇ ਇੱਕ ਮਰੀਜ਼ ਦੀ ਮੌਤ ਹੋ ਗਈ ਹੈ। ਸ਼ਹਿਰ ਵਿੱਚ ਕਰੋਨਾ ਪੀੜਤਾਂ ਦੀ ਗਿਣਤੀ 549 ਜਦਕਿ ਮ੍ਰਿਤਕਾਂ ਦੀ ਗਿਣਤੀ ਅੱਠ ਹੋ ਗਈ ਹੈ। ਸ਼ਹਿਰ ’ਚ ਇਸ ਸਮੇਂ ਕੁੱਲ ਸਰਗਰਮ ਕੇਸ 121 ਹਨ ਤੇ 413 ਮਰੀਜ਼ ਠੀਕ ਹੋ ਚੁੱਕੇ ਹਨ। ਸੈਕਟਰ-52 ਵਾਸੀ ਇਸ ਮ੍ਰਿਤਕ ਵਿਅਕਤੀ ਦੀ ਊਮਰ 40 ਸਾਲ ਸੀ ਤੇ ਸ਼ਰਾਬ ਪੀਣ ਦਾ ਆਦੀ ਸੀ। ਊਹ ਲੀਵਰ ਦੀ ਬਿਮਾਰੀ ਨਾਲ ਪੀੜਤ ਸੀ। ਉਸ ਨੂੰ ਇਲਾਜ ਲਈ ਸੈਕਟਰ-16 ਸਥਿਤ ਜੀਐੱਮਸੀਐੱਚ ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਡਾਕਟਰਾਂ ਨੇ ਦੱਸਿਆ ਕਿ ਮਰੀਜ਼ ਦੀ ਹਸਪਤਾਲ ਪਹੁੰਚਣ ਤੋਂ ਪਹਿਲਾਂ ਹੀ ਮੌਤ ਹੋ ਚੁੱਕੀ ਸੀ। ਉਸ ਦੀ ਮੌਤ ਮਗਰੋਂ ਕਰੋਨਾ ਟੈਸਟ ਕੀਤਾ ਗਿਆ ਤਾਂ ਊਸ ਦੀ ਰਿਪੋਰਟ ਪਾਜ਼ੇਟਿਵ ਪਾਈ ਗਈ। ਸਿਹਤ ਵਿਭਾਗ ਨੇ ਇਸ ਮੌਤ ਨੂੰ ਕੋਰੋਨਾ ਮਰੀਜ਼ਾਂ ਦੀ ਅੱਠਵੀਂ ਮੌਤ ਵਿੱਚ ਗਿਣਿਆ ਹੈ।
ਸਿਹਤ ਵਿਭਾਗ ਤੋਂ ਮਿਲੀ ਜਾਣਕਾਰੀ ਮੁਤਾਬਕ ਸ਼ਹਿਰ ਵਿੱਚ ਅੱਜ ਕਰੋਨਾ ਦੇ 13 ਮਰੀਜ਼ਾਂ ਦੀਆਂ ਰਿਪੋਰਟਾਂ ਪਾਜ਼ੇਟਿਵ ਆਈਆਂ ਹਨ ਜਿਨ੍ਹਾਂ ਵਿੱਚੋਂ ਬੀਤੇ ਦਿਨ ਪੀਜੀਆਈ ਦੇ ਇਲੈਕਟ੍ਰੀਕਲ ਵਿੰਗ ਦੀ ਮਹਿਲਾ ਅਕਾਉਂਟਸ ਅਫ਼ਸਰ ਦੀ 20 ਸਾਲਾ ਬੇਟੀ ਵੀ ਸ਼ਾਮਲ ਹਨ। ਇਸ ਪ੍ਰਕਾਰ ਬਾਕੀ ਮਰੀਜ਼ਾਂ ਵਿੱਚ ਸੈਕਟਰ 44 ਤੋਂ 17 ਸਾਲਾ ਲੜਕੇ ਸਮੇਤ 44 ਸਾਲਾ ਔਰਤ ਅਤੇ 38 ਸਾਲਾ ਵਿਅਕਤੀ, ਸੈਕਟਰ 52 ਤੋਂ 26 ਸਾਲਾ ਲੜਕੀ, ਸੈਕਟਰ 37 ਤੋਂ 47 ਸਾਲਾ ਵਿਅਕਤੀ, ਸੈਕਟਰ 50 ਤੋਂ 59 ਸਾਲਾ ਵਿਅਕਤੀ, ਸੈਕਟਰ 35 ਤੋਂ 46 ਸਾਲਾ ਔਰਤ, ਸੈਕਟਰ 32 ਤੋਂ 41 ਸਾਲਾ ਵਿਅਕਤੀ ਸਮੇਤ 40 ਅਤੇ 42 ਸਾਲਾ ਦੋ ਔਰਤਾਂ ਨੂੰ ਕਰੋਨਾ ਹੋਣ ਦੀ ਪੁਸ਼ਟੀ ਹੋਈ ਹੈ।
ਇਸ ਤੋਂ ਇਲਾਵਾ ਅੱਜ ਸ਼ਹਿਰ ਦੇ ਵਸਨੀਕ 5 ਮਰੀਜ਼ ਠੀਕ ਵੀ ਹੋਏ ਹਨ। ਇਨ੍ਹਾਂ ਵਿੱਚ ਪਿੰਡ ਧਨਾਸ ਤੋਂ 40 ਸਾਲਾ ਵਿਅਕਤੀ, ਸੈਕਟਰ 50 ਤੋਂ 9 ਮਹੀਨਿਆਂ ਦੀ ਛੋਟੀ ਬੱਚੀ ਸਮੇਤ 31 ਤੇ 64 ਸਾਲਾ ਵਿਅਕਤੀ ਤੇ 31 ਸਾਲਾ ਔਰਤ ਸ਼ਾਮਲ ਹੈ।
ਅੰਬਾਲਾ ’ਚ ਕਰੋਨਾ ਦੇ ਰਿਕਾਰਡ 42 ਕੇਸ
ਅੰਬਾਲਾ (ਨਿੱਜੀ ਪੱਤਰ ਪ੍ਰੇਰਕ): ਅੰਬਾਲਾ ਜ਼ਿਲ੍ਹੇ ਵਿੱਚ ਅੱਜ ਕਰੋਨਾ ਦੇ 42 ਮਾਮਲੇ ਸਾਹਮਣੇ ਆਏ ਹਨ। ਇਨ੍ਹਾਂ ’ਚੋਂ ਸ਼ਹਿਰ ਦੇ 25, ਅੰਬਾਲਾ ਛਾਉਣੀ ਦੇ 13 ਅਤੇ ਚੌੜਮਸਤਪੁਰ ਦੇ 4 ਕੇਸ ਸ਼ਾਮਲ ਹਨ। ਸਿਵਲ ਸਰਜਨ ਡਾ. ਕੁਲਦੀਪ ਸਿੰਘ ਨੇ ਦੱਸਿਆ ਕਿ ਜਿੱਥੇ 42 ਨਵੇਂ ਕੇਸ ਆਏ ਹਨ, ਉਥੇ ਅੱਜ 20 ਮਰੀਜ਼ਾਂ ਦੀ ਇਲਾਜ ਤੋਂ ਬਾਅਦ ਹਸਪਤਾਲ ਵਿਚੋਂ ਛੁੱਟੀ ਵੀ ਕੀਤੀ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਅੰਬਾਲਾ ਵਿਚ ਐਕਟਿਵ ਮਰੀਜ਼ਾਂ ਦੀ ਗਿਣਤੀ 112 ਹੋ ਗਈ ਹੈ।
ਪੰਚਕੂਲਾ ਜ਼ਿਲ੍ਹੇ ਵਿੱਚ ਛੇ ਨਵੇਂ ਕੇਸ
ਪੰਚਕੂਲਾ (ਪੱਤਰ ਪ੍ਰੇਰਕ):ਪੰਚਕੂਲਾ ਜ਼ਿਲ੍ਹੇ ਵਿੱਚ 6 ਨਵੇਂ ਕਰੋਨਾ ਪਾਜ਼ੇਟਿਵ ਮਰੀਜ਼ ਸਾਹਮਣੇ ਆਏ ਹਨ। ਇਨ੍ਹਾਂ ਵਿੱਚ ਸੈਕਟਰ-7 ਵਿੱਚ 77 ਸਾਲਾ ਦਾ ਬਜ਼ੁਰਗ, ਸੈਕਟਰ-25 ਵਿੱਚ 34 ਸਾਲਾ ਵਿਅਕਤੀ, ਸੈਕਟਰ-26 ਵਿੱਚ 46 ਸਾਲਾ ਅਤੇ ਕਾਲਕਾ ਦੇ ਮੜਾਂਵਾਲਾ ਵਿੱਚ 64 ਸਾਲਾ ਬਜ਼ੁਰਗ ਕਰੋਨਾ ਪਾਜ਼ੇਟਿਵ ਆਇਆ ਹੈ। ਇਸ ਦੇ ਨਾਲ ਹੀ ਦੇਰ ਸ਼ਾਮ ਕਾਲਕਾ ’ਚ ਦੋ ਹੋਰ ਕੋਰੋਨਾ ਪਾਜ਼ੇਟਿਵ ਮਰੀਜ਼ ਮਿਲੇ। ਮਰੀਜ਼ਾਂ ਨੂੰ ਆਈਸੋਲੇਸ਼ਨ ਵਾਰਡ ਵਿੱਚ ਦਾਖ਼ਲ ਕੀਤਾ ਗਿਆ ਹੈ।
ਗਿਆਨ ਸਾਗਰ ’ਚੋਂ 18 ਮਰੀਜ਼ਾਂ ਨੂੰ ਛੁੱਟੀ ਮਿਲੀ
ਕਰਮਜੀਤ ਸਿੰਘ ਚਿੱਲਾ
ਬਨੂੜ, 11 ਜੁਲਾਈ
ਗਿਆਨ ਸਾਗਰ ਹਸਪਤਾਲ ’ਚੋਂ 18 ਕਰੋਨਾ ਪੀੜਤਾਂ ਨੂੰ ਘਰ ਭੇਜ ਦਿੱਤਾ ਗਿਆ। ਇਨ੍ਹਾਂ ਸਾਰਿਆਂ ਨੂੰ ਆਪੋ ਆਪਣੇ ਘਰ ਇੱਕ ਹਫ਼ਤੇ ਲਈ ਇਕਾਂਤਵਾਸ ਰਹਿਣ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਹਸਪਤਾਲ ਦੇ ਮੈਡੀਕਲ ਸੁਪਰਡੈਂਟ ਡਾ. ਐੱਸਪੀਐੱਸ ਗੁਰਾਇਆ ਨੇ ਦੱਸਿਆ ਕਿ ਜਿਨ੍ਹਾਂ ਮਰੀਜ਼ਾਂ ਨੂੰ ਘਰ ਭੇਜਿਆ ਗਿਆ ਹੈ ਉਨ੍ਹਾਂ ਵਿੱਚ 15 ਮਰੀਜ਼ ਮੁਹਾਲੀ ਜ਼ਿਲ੍ਹੇ ਦੇ ਹਨ। ਇਸੇ ਤਰ੍ਹਾਂ ਰੂਪਨਗਰ ਜ਼ਿਲ੍ਹੇ ਦਾ ਰਾਮ ਕੁਮਾਰ, ਫ਼ਤਹਿਗੜ੍ਹ ਸਾਹਿਬ ਜ਼ਿਲ੍ਹੇ ਦਾ ਸ਼ਸ਼ੀ ਪਾਲ ਸ਼ਾਮਿਲ ਹੈ। ਉਨ੍ਹਾਂ ਦੱਸਿਆ ਕਿ ਚੰਡੀਗੜ੍ਹ ਦੇ ਇੱਕ ਵਸਨੀਕ ਸਮਸ਼ੇਰ ਸਿੰਘ ਨੂੰ ਵੀ ਅੱਜ ਘਰ ਭੇਜ ਦਿੱਤਾ ਗਿਆ ਹੈ। ਹਸਪਤਾਲ ਵਿੱਚ ਅੱਜ ਆਏ ਚਾਰ ਨਵੇਂ ਮਰੀਜ਼ਾਂ ਸਮੇਤ ਜ਼ੇਰੇ ਇਲਾਜ 99 ਮਰੀਜ਼ਾਂ ਦੀ ਹਾਲਤ ਬਿਲਕੁੱਲ ਸਥਿਰ ਹੈ। ਇਸੇ ਤਰ੍ਹਾਂ ਬਨੂੜ ਦੇ ਕਰੋਨਾ ਪੀੜਤ ਫ਼ਲ ਵਿਕਰੇਤਾ ਦੇ ਪਰਿਵਾਰਕ ਮੈਂਬਰਾਂ ਅਤੇ ਸੰਪਰਕ ਵਿੱਚ ਆਏ 29 ਦੇ ਕਰੀਬ ਵਿਅਕਤੀਆਂ ਦੇ ਅੱਜ ਸੈਂਪਲ ਲਏ ਗਏ ਹਨ।