Superbug ਨੂੰ ਸੁੰਘਣ ਵਾਲਾ ਦੁਨੀਆ ਦਾ ਮਾਹਰ ਕੁੱਤਾ Angus ਹੋਇਆ ਰਿਟਾਇਰ
10 ਸਾਲਾਂ ਦੀ ਸੇਵਾ ਦੌਰਾਨ ਹਜ਼ਾਰਾਂ ਮਰੀਜ਼ਾਂ ਦੀ ਜਾਨ ਬਚਾਈ; ਹਸਪਤਾਲਾਂ ਵਿੱਚ ਖ਼ਤਰਨਾਕ ਬੈਕਟੀਰੀਆ ਲੱਭਣ ’ਚ ਸੀ ਮਾਹਰ
ਕੈਨੇਡਾ ਦੇ ਵੈਨਕੂਵਰ ਜਨਰਲ ਹਸਪਤਾਲ ਵਿੱਚ ਪਿਛਲੇ 10 ਸਾਲਾਂ ਤੋਂ ਆਪਣੀ ਨੱਕ ਰਾਹੀਂ ਖ਼ਤਰਨਾਕ ਹਸਪਤਾਲ ਸੁਪਰਬੱਗ ਸੀ. ਡਿਫੀਸਿਲ' (C. difficile) ਦਾ ਪਤਾ ਲਗਾਉਣ ਵਾਲਾ ਮਸ਼ਹੂਰ ਅੰਗਰੇਜ਼ੀ ਸਪ੍ਰਿੰਗਰ ਸਪੈਨੀਅਲ ਕੁੱਤਾ ‘ਐਂਗਸ’ (Angus) ਹੁਣ ਸੇਵਾਮੁਕਤ ਹੋ ਗਿਆ ਹੈ। 13 ਸਾਲ ਦੀ ਉਮਰ ਵਿੱਚ ਰਿਟਾਇਰ ਹੋਏ ਐਂਗਸ ਨੇ ਆਪਣੀ ਜ਼ਿੰਦਗੀ ਦਾ 85 ਫੀਸਦੀ ਹਿੱਸਾ ਮਰੀਜ਼ਾਂ ਦੀ ਸੇਵਾ ਵਿੱਚ ਬਿਤਾਇਆ।
ਇਹ ਬੈਕਟੀਰੀਆ ਇੰਨਾ ਖ਼ਤਰਨਾਕ ਹੁੰਦਾ ਹੈ ਕਿ ਇਹ ਮਰੀਜ਼ਾਂ ਵਿੱਚ ਗੰਭੀਰ ਬੀਮਾਰੀਆਂ ਪੈਦਾ ਕਰਦਾ ਹੈ ਅਤੇ ਆਮ ਸਫ਼ਾਈ ਦੌਰਾਨ ਵੀ ਫਰਨੀਚਰ ਜਾਂ ਉਪਕਰਨਾਂ ਵਿੱਚ ਛੁਪਿਆ ਰਹਿੰਦਾ ਹੈ। ਐਂਗਸ ਦੀ ਅਦਭੁਤ ਸੁੰਘਣ ਸ਼ਕਤੀ ਨੇ ਕੈਨੇਡਾ ਦੇ 32 ਹਸਪਤਾਲਾਂ ਵਿੱਚ ਹਜ਼ਾਰਾਂ ਕਮਰਿਆਂ ਦੀ ਜਾਂਚ ਕਰਕੇ ਇਨਫੈਕਸ਼ਨ ਨੂੰ ਫੈਲਣ ਤੋਂ ਰੋਕਣ ਵਿੱਚ ਅਹਿਮ ਭੂਮਿਕਾ ਨਿਭਾਈ।
ਐਂਗਸ ਦੀ ਟਰੇਨਰ ਟੇਰੇਸਾ ਜ਼ੁਰਬਰਗ ਵੱਲੋਂੱ 29 ਮਾਰਚ ਨੂੰ ਉਸ ਲਈ ਇੱਕ ਸ਼ਾਨਦਾਰ ਰਿਟਾਇਰਮੈਂਟ ਪਾਰਟੀ ਕਰਵਾਈ ਗਈ। ਟੇਰੇਸਾ ਅਨੁਸਾਰ, ਹਾਲਾਂਕਿ ਐਂਗਸ ਅਜੇ ਵੀ ਕੰਮ ਵਿੱਚ ਮਾਹਰ ਸੀ, ਪਰ ਵਧਦੀ ਉਮਰ ਕਾਰਨ ਉਸ ਦਾ ਸਰੀਰ ਥੱਕਣ ਲੱਗ ਪਿਆ ਸੀ। ਹੁਣ ਐਂਗਸ ਬ੍ਰਿਟਿਸ਼ ਕੋਲੰਬੀਆ ਵਿੱਚ ਇੱਕ ਸ਼ਾਂਤਮਈ ਜੀਵਨ ਬਤੀਤ ਕਰੇਗਾ ਅਤੇ ਗੁੰਮ ਹੋਏ ਤੀਰਾਂ ਨੂੰ ਲੱਭਣ ਵਰਗੇ ਛੋਟੇ-ਮੋਟੇ ਕੰਮਾਂ ਦਾ ਆਨੰਦ ਲਵੇਗਾ। ਹਸਪਤਾਲ ਪ੍ਰਸ਼ਾਸਨ ਨੇ ਉਸ ਦੀਆਂ ਸੇਵਾਵਾਂ ਦੀ ਸ਼ਲਾਘਾ ਕੀਤੀ ਹੈ ਅਤੇ ਉਸ ਦੀ ਟਰੇਨਰ ਉਮੀਦ ਹੈ ਕਿ ਐਂਗਸ ਨੂੰ ਉਸਦੇ ਮਹਾਨ ਕਾਰਜ ਲਈ ‘ਕੈਨੇਡੀਅਨ ਸਰਵਿਸ ਮੈਡਲ’ ਨਾਲ ਸਨਮਾਨਿਤ ਕੀਤਾ ਜਾਵੇਗਾ। ਉਸ ਦੀ ਸ਼ੁਰੂਆਤ ਤੋਂ ਬਾਅਦ ਹੁਣ ਕਈ ਹੋਰ ਕੁੱਤੇ ਵੀ ਇਸ ਵਿਸ਼ੇਸ਼ ਪ੍ਰੋਗਰਾਮ ਦਾ ਹਿੱਸਾ ਬਣ ਚੁੱਕੇ ਹਨ।
