ਪੀਪੀ ਵਰਮਾ
ਪੰਚਕੂਲਾ, 7 ਅਗਸਤ
ਇਥੋਂ ਦੇ ਸਨਅਤੀ ਏਰੀਆ ਵਿੱਚ ਸਟਾਈਲਮ ਫੈਕਟਰੀ, ਜਿਹੜੀ ਗੋਲਡਨ ਲੈਮੀਨੇਸ਼ਨ ਨਾਂ ਨਾਲ ਵੀ ਜਾਣੀ ਜਾਂਦੀ ਹੈ, ਵਿੱਚ ਅੱਜ ਅੱਗ ਲੱਗ ਗਈ। ਇਸ ਘਟਨਾ ਕਾਰਨ ਦੋ ਮਜ਼ਦੂਰ ਜ਼ਖਮੀ ਹੋ ਗਏ। ਉਨ੍ਹਾਂ ਨੂੰ ਪੰਚਕੂਲਾ ਦੇ ਸਰਕਾਰੀ ਜਨਰਲ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ। ਇਹ ਫੈਕਟਰੀ ਇੰਡਸਟਰੀਅਲ ਏਰੀਏ-ਏ ਦੋ ਵੱਡੇ ਪਲਾਟਾਂ ਵਿੱਚ ਉਸਾਰੀ ਹੋਈ ਹੈ। ਇਸ ਫੈਕਟਰੀ ਵਿੱਚ ਸਨਮਾਇਕਾ ਅਤੇ ਪਲਾਈਵੁੱਡ ਬਣਾਈ ਜਾਂਦੀ ਹੈ।
ਕੰਪਨੀ ਦੇ ਮੈਨੇਜਰ ਸਾਹਿਲ ਸਿੰਗਲਾ ਨੇ ਦੱਸਿਆ ਕਿ ਅੱਗ ਲੱਗਣ ਦੌਰਾਨ ਜਾਨੀ ਨੁਕਸਾਨ ਤੋਂ ਬਚਾਅ ਰਿਹਾ। ਫਾਇਰ ਸਟੇਸ਼ਨ ਪੰਚਕੂਲਾ ਦੇ ਚੀਫ਼ ਅਫ਼ਸਰ ਤਰਸੇਮ ਸਿੰਘ ਨੇ ਦੱਸਿਆ ਕਿ ਜਦੋਂ ਤੱਕ ਉਨ੍ਹਾਂ ਦੀ ਟੀਮ ਘਟਨਾ ਵਾਲੀ ਥਾਂ ਉੱਤੇ ਪਹੁੰਚੀ ਤਾਂ ਜ਼ਖ਼ਮੀਆਂ ਨੂੰ ਹਸਪਤਾਲ ਭੇਜਿਆ ਜਾ ਚੁੱਕਾ ਸੀ। ਉਨ੍ਹਾਂ ਦੱਸਿਆ ਕਿ ਸਵੇਰੇ 7 ਵਜੇ ਅੱਗ ਦੀ ਘਟਨਾ ਬਾਰੇ ਸੂਚਨਾ ਮਿਲੀ ਤੇ ਫਾਇਰ ਬ੍ਰਿਗੇਡ ਦੀਆਂ ਪੰਜ ਗੱਡੀਆਂ ਨੇ ਦੋ-ਢਾਈ ਘੰਟੇ ਦੀ ਮੁਸ਼ੱਕਤ ਤੋਂ ਬਾਅਦ ਅੱਗ ਉੱਤੇ ਕਾਬੂ ਪਾਇਆ। ਫੈਕਟਰੀ ਦੇ ਮੈਨੇਜਰ ਅਨੁਸਾਰ ਮਸ਼ੀਨ ਵਿੱਚੋਂ ਨਿਕਲੀ ਚੰਗਿਆੜੀ ਕਾਰਨ ਅੱਗ ਲੱਗੀ ਤੇ ਫੈਕਟਰੀ ਦੇ ਬਾਹਰ ਲੋਕਾਂ ਦੀ ਭੀੜ ਇਕੱਠੀ ਹੋ ਗਈ। ਫਾਇਰ ਵਿਭਾਗ ਅਨੁਸਾਰ ਅੱਗ ਉਸ ਵੇਲੇ ਵਧੇਰੇ ਫੈਲੀ ਜਦੋਂ ਲੱਕੜੀ ਦਾ ਬੁਰਾਦਾ ਇਸ ਦੀ ਲਪੇਟ ਵਿੱਚ ਆ ਗਿਆ।