ਵ੍ਹਟਸਐਪ ਵੱਲੋਂ 13 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਲਈ ਅਕਾਊਂਟ ਸ਼ੁਰੂ

ਮੈਟਾ ਦੀ ਮਾਲਕੀ ਵਾਲੇ ਵ੍ਹਟਸਐਪ ਨੇ 13 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਲਈ ਆਪਣੇ ਮੈਸੇਜਿੰਗ ਪਲੈਟਫਾਰਮ ਦੇ ਦਰ ਖੋਲ੍ਹ ਦਿੱਤੇ ਹਨ। ਵ੍ਹਟਸਐਪ ਨੇ ਇਸ ਉਮਰ ਵਰਗ ਲਈ ‘ਮਾਪਿਆਂ ਦੇ ਕੰਟਰੋਲ’ ਵਾਲਾ ਨਵਾਂ ਅਕਾਊਂਟ ਮਾਡਲ ਲਾਂਚ ਕੀਤਾ ਹੈ। ਮੈਸੇਜਿੰਗ ਐਪ ਲਈ ਇਹ ਪੇਸ਼ਕਦਮੀ ਵੱਡੀ ਰਣਨੀਤਕ ਤਬਦੀਲੀ ਹੈ, ਜਿਸ ਵਿੱਚ ਪਹਿਲਾਂ ਹੀ ਘੱਟੋ ਘੱਟ ਉਮਰ 13 ਸਾਲ (ਜਾਂ ਕੁਝ ਖੇਤਰਾਂ ਵਿੱਚ ਵੱਧ) ਰੱਖੀ ਗਈ ਹੈ।

ਵ੍ਹਟਸਐਪ ਨੇ ਬਲੌਗ ਪੋਸਟ ਵਿੱਚ ਕਿਹਾ, ‘‘ਪਰਿਵਾਰਾਂ ਤੇ ਮਾਹਿਰਾਂ ਤੋਂ ਮਿਲੀ ਜਾਣਕਾਰੀ ਮਗਰੋਂ ਅਸੀਂ ਮਾਪਿਆਂ ਦੇ ਕੰਟਰੋਲ ਵਾਲੇ ਅਕਾਊਂਟਾਂ ਦੀ ਸ਼ੁਰੂਆਤ ਕੀਤੀ ਹੈ। ਇਹ ਖਾਤੇ ਮਾਪਿਆਂ ਜਾਂ ਸਰਪ੍ਰਸਤਾਂ ਨੂੰ ਇਸ ਉਮਰ ਵਰਗ ਦੇ ਬੱਚਿਆਂ ਲਈ ਵ੍ਹਟਸਐੱਪ ਸੈਟਅੱਪ ਦੀ ਖੁੱਲ੍ਹ ਦੇਣਗੇ। ਮੈੈਸੇਜਿੰਗ ਤੇ ਕਾਲਿੰਗ ਲਈ ਐਪ ਵਿੱਚ ਨਵੇਂ ਕੰਟਰੋਲ ਹੋਣਗੇ।’’ ਵ੍ਹਟਸਐਪ ਨੇ ਕਿਹਾ ਕਿ ਮਾਪੇ ਜਿੱਥੇ ਸੰਪਰਕ ਸੂਚੀ (ਕੰਟੈਕਟ ਲਿਸਟ) ਨੂੰ ਕੰਟਰੋਲ ਕਰ ਸਕਣਗੇ ਉਥੇ ਮੈਸੇਜਿੰਗ ਦਾ ਵਿਸ਼ਾ ਵਸਤੂ ਐੰਡ ਟੂ ਐਂੰਡ ਐਨਕ੍ਰਿਪਸ਼ਨ ਤਹਿਤ ਸੁਰੱਖਿਅਤ ਰਹੇਗਾ। ਸਬੰਧਤ ਯੰਤਰ ਉੱਤੇ ਪੇਰੈਂਟਲ ਕੰਟਰੋਲ ਤੇ ਹੋਰ ਸੈਟਿੰਗਾਂ ਪੇਰੈਂਟ ਪਿੰਨ (ਮਾਪਿਆਂ ਦੇ ਪਾਸਵਰਡ) ਤਹਿਤ ਸੁਰੱਖਿਅਤ ਰਹਿਣਗੀਆਂ। ਸਿਰਫ਼ ਮਾਪੇ ਹੀ ਪ੍ਰਾਈਵੇਸੀ ਸੈਟਿੰਗਾਂ ਤੱਕ ਰਸਾਈ ਤੇ ਫੇਰਬਦਲ ਕਰ ਸਕਣਗੇ। ਇਸ ਫੀਚਰ ਨੂੰ ਮੌਜੂਦਾ ਸਮੇਂ ਪੜਾਅਵਾਰ ਸ਼ੁਰੂ ਕੀਤਾ ਗਿਆ ਹੈ।