ਸਤੰਬਰ ਵਿੱਚ UPI ਲੈਣ-ਦੇਣ 1.8 ਫੀਸਦੀ ਘੱਟ ਕੇ ਰਹਿ ਗਿਆ 2,407 ਕਰੋੜ
IMPS, RTGS ਅਤੇ NEFT ਦੇ ਅੰਕੜੇ ਵੀ ਕੀਤੇ ਗਏ ਜਾਰੀ
ਭਾਰਤੀ ਰਿਜ਼ਰਵ ਬੈਂਕ ਵੱਲੋਂ ਵੀਰਵਾਰ ਨੂੰ ਜਾਰੀ ਕੀਤੇ ਗਏ ਅੰਕੜਿਆਂ ਮੁਤਾਬਕ ਯੂ ਪੀ ਆਈ (UPI) ਰਾਹੀਂ ਲੈਣ-ਦੇਣ ਸਤੰਬਰ ਵਿੱਚ ਮਾਸਿਕ ਆਧਾਰ 'ਤੇ 1.8 ਫੀਸਦੀ ਘੱਟ ਕੇ 2,407 ਕਰੋੜ ਰਿਹਾ ਹੈ।
ਨੈਸ਼ਨਲ ਪੇਮੈਂਟਸ ਕਾਰਪੋਰੇਸ਼ਨ ਆਫ ਇੰਡੀਆ (NPCI) ਵੱਲੋਂ ਸੰਚਾਲਿਤ ਯੂ ਪੀ ਆਈ (ਯੂਨੀਫਾਈਡ ਪੇਮੈਂਟਸ ਇੰਟਰਫੇਸ) ਰਾਹੀਂ ਅਗਸਤ ਵਿੱਚ 2,450 ਕਰੋੜ ਲੈਣ-ਦੇਣ ਹੋਏ ਸਨ।ਅੰਕੜਿਆਂ ਅਨੁਸਾਰ, ਸਤੰਬਰ ਵਿੱਚ ਯੂ ਪੀ ਆਈ ਰਾਹੀਂ ਲੈਣ-ਦੇਣ ਦਾ ਕੁੱਲ ਮੁੱਲ ਵੀ 1.50 ਫੀਸਦੀ ਘੱਟ ਕੇ 29.37 ਲੱਖ ਕਰੋੜ ਰੁਪਏ ਰਿਹਾ, ਜਿਹੜਾ ਕਿ ਅਗਸਤ ਵਿੱਚ 29.82 ਲੱਖ ਕਰੋੜ ਰੁਪਏ ਸੀ।
ਇਹ ਅੰਕੜੇ ਕਾਰੋਬਾਰੀਆਂ ਲਈ ਵੱਧ ਰਕਮ ਵਾਲੇ ਯੂ ਪੀ ਆਈ ਭੁਗਤਾਨ 'ਤੇ ਮਰਚੈਂਟ ਡਿਸਕਾਊਂਟ ਰੇਟ (MDR) ਲਾਗੂ ਹੋਣ ਤੋਂ ਕਰੀਬ ਦੋ ਹਫ਼ਤੇ ਪਹਿਲਾਂ ਆਏ ਹਨ। ਉਦਯੋਗ ਨਾਲ ਜੁੜੇ ਮਾਹਿਰਾਂ ਅਨੁਸਾਰ, ਲੈਣ-ਦੇਣ ਵਿੱਚ ਗਿਰਾਵਟ ਦਾ ਕਾਰਨ ਅਗਸਤ ਵਿੱਚ 31 ਦਿਨ ਅਤੇ ਸਤੰਬਰ ਵਿੱਚ 30 ਦਿਨ ਹੋਣਾ ਹੈ। ਇਸ ਦੇ ਬਾਵਜੂਦ, ਸਤੰਬਰ ਵਿੱਚ ਰੋਜ਼ਾਨਾ ਔਸਤ ਲੈਣ-ਦੇਣ ਵਧ ਕੇ 80.2 ਕਰੋੜ ਰਿਹਾ, ਜਦਕਿ ਅਗਸਤ ਵਿੱਚ ਇਹ 79.1 ਕਰੋੜ ਸੀ।
ਆਰ ਬੀ ਆਈ (RBI) ਦੇ ਅੰਕੜਿਆਂ ਅਨੁਸਾਰ, ਐੱਨ ਪੀ ਸੀ ਆਈ ਵੱਲੋਂ ਸੰਚਾਲਿਤ ਤੁਰੰਤ ਭੁਗਤਾਨ ਸੇਵਾ (IMPS) ਰਾਹੀਂ 35.40 ਕਰੋੜ ਲੈਣ-ਦੇਣ ਹੋਏ, ਜਿਨ੍ਹਾਂ ਦਾ ਕੁੱਲ ਮੁੱਲ 7.05 ਲੱਖ ਕਰੋੜ ਰੁਪਏ ਰਿਹਾ।
ਉੱਥੇ ਹੀ ਰੀਅਲ-ਟਾਈਮ ਗ੍ਰੌਸ ਸੈਟਲਮੈਂਟ (RTGS) ਪ੍ਰਣਾਲੀ ਰਾਹੀਂ ਸਤੰਬਰ ਵਿੱਚ 3.25 ਕਰੋੜ ਲੈਣ-ਦੇਣ ਹੋਏ, ਜਿਨ੍ਹਾਂ ਦਾ ਮੁੱਲ 235.71 ਲੱਖ ਕਰੋੜ ਰੁਪਏ ਰਿਹਾ। ਇਸ ਦੇ ਨਾਲ ਹੀ, ਨੈਸ਼ਨਲ ਇਲੈਕਟ੍ਰਾਨਿਕ ਫੰਡ ਟਰਾਂਸਫਰ (NEFT) ਰਾਹੀਂ ਸਤੰਬਰ ਵਿੱਚ 86.2 ਕਰੋੜ ਲੈਣ-ਦੇਣ ਹੋਏ ਅਤੇ ਇਨ੍ਹਾਂ ਦਾ ਕੁੱਲ ਮੁੱਲ 46.75 ਲੱਖ ਕਰੋੜ ਰੁਪਏ ਰਿਹਾ।
