Stock Market: ਸ਼ੇਅਰ ਬਾਜ਼ਾਰ 2 ਫੀਸਦੀ ਤੋਂ ਵੱਧ ਟੁੱਟਿਆ; ਵਿੱਤੀ ਸਾਲ 2026 ਦਾ ਅੰਤ ਨੁਕਸਾਨ ਨਾਲ

ਰੁਪੱਈਆ ਅਮਰੀਕੀ ਡਾਲਰ ਦੇ ਮੁਕਾਬਲੇ 94.78 ’ਤੇ ਹੋਇਆ ਬੰਦ

PTI

ਮੁੰਬਈ, 04:21 PM Mar 30, 2026 IST

ਸੰਕੇਤਕ ਤਸਵੀਰ।

ਇਕੁਇਟੀ ਬੈਂਚਮਾਰਕ ਸੂਚਕ ਸੈਂਸੈਕਸ ਅਤੇ ਨਿਫਟੀ ਨੇ ਸੋਮਵਾਰ ਨੂੰ ਵਿੱਤੀ ਸਾਲ 2025-26 ਦੇ ਆਖਰੀ ਕਾਰੋਬਾਰੀ ਸੈਸ਼ਨ ਦਾ ਅੰਤ ਭਾਰੀ ਗਿਰਾਵਟ ਨਾਲ ਕੀਤਾ, ਕਿਉਂਕਿ ਪੱਛਮੀ ਏਸ਼ੀਆ ਵਿੱਚ ਚੱਲ ਰਹੀ ਜੰਗ ਅਤੇ ਕੱਚੇ ਤੇਲ ਦੀਆਂ ਵਧਦੀਆਂ ਕੀਮਤਾਂ ਨੇ ਨਿਵੇਸ਼ਕਾਂ ਦੇ ਉਤਸ਼ਾਹ ਨੂੰ ਕਮਜ਼ੋਰ ਬਣਾਏ ਰੱਖਿਆ । ਏਸ਼ੀਆਈ ਬਾਜ਼ਾਰਾਂ ਵਿੱਚ ਕਮਜ਼ੋਰ ਰੁਝਾਨ ਅਤੇ ਵਿਦੇਸ਼ੀ ਫੰਡਾਂ ਦੀ ਲਗਾਤਾਰ ਨਿਕਾਸੀ ਨੇ ਵੀ ਘਰੇਲੂ ਇਕੁਇਟੀ ਵਿੱਚ ਮੰਦੀ ਦੇ ਰੁਝਾਨ ਨੂੰ ਵਧਾਇਆ ।

ਲਗਾਤਾਰ ਦੂਜੇ ਦਿਨ ਗਿਰਾਵਟ ਦਰਜ ਕਰਦੇ ਹੋਏ 30 ਸ਼ੇਅਰਾਂ ਵਾਲਾ ਬੀ ਐੱਸ ਈ (BSE) ਸੈਂਸੈਕਸ 1,635.67 ਅੰਕ ਜਾਂ 2.22 ਫੀਸਦੀ ਡਿੱਗ ਕੇ 71,947.55 'ਤੇ ਬੰਦ ਹੋਇਆ । ਦਿਨ ਦੇ ਦੌਰਾਨ ਇਹ 1,809.09 ਅੰਕ ਜਾਂ 2.45 ਫੀਸਦੀ ਖਿਸਕ ਕੇ 71,774.13 'ਤੇ ਆ ਗਿਆ ਸੀ । 50 ਸ਼ੇਅਰਾਂ ਵਾਲਾ ਐੱਨ ਐੱਸ ਈ (NSE) ਨਿਫਟੀ 488.20 ਅੰਕ ਜਾਂ 2.14 ਫੀਸਦੀ ਦੀ ਗਿਰਾਵਟ ਨਾਲ 22,331.40 ’ਤੇ ਬੰਦ ਹੋਇਆ ।

ਸੈਂਸੈਕਸ ਦੀਆਂ 30 ਕੰਪਨੀਆਂ ਵਿੱਚੋਂ ਬਜਾਜ ਫਾਈਨੈਂਸ, ਸਟੇਟ ਬੈਂਕ ਆਫ ਇੰਡੀਆ, ਇੰਟਰਗਲੋਬ ਐਵੀਏਸ਼ਨ, ਬਜਾਜ ਫਿਨਸਰਵ, ਐਕਸਿਸ ਬੈਂਕ ਅਤੇ ਕੋਟਕ ਮਹਿੰਦਰਾ ਬੈਂਕ ਸਭ ਤੋਂ ਵੱਧ ਨੁਕਸਾਨ ਵਿੱਚ ਰਹੇ । ਦੂਜੇ ਪਾਸੇ ਟੈੱਕ ਮਹਿੰਦਰਾ ਅਤੇ ਪਾਵਰ ਗਰਿੱਡ ਮੁਨਾਫੇ ਵਿੱਚ ਰਹੇ । ਗਲੋਬਲ ਤੇਲ ਬੈਂਚਮਾਰਕ ਬ੍ਰੈਂਟ ਕਰੂਡ 2.18 ਫੀਸਦੀ ਉਛਲ ਕੇ 115.1 ਅਮਰੀਕੀ ਡਾਲਰ ਪ੍ਰਤੀ ਬੈਰਲ 'ਤੇ ਪਹੁੰਚ ਗਿਆ ।

ਵਿੱਤੀ ਸਾਲ 2025-26 ਵਿੱਚ ਬੀ ਐੱਸ ਈ ਬੈਂਚਮਾਰਕ ਵਿੱਚ 5,467.37 ਅੰਕ ਜਾਂ 7 ਫੀਸਦੀ ਦੀ ਗਿਰਾਵਟ ਆਈ ਅਤੇ ਨਿਫਟੀ 1,187.95 ਅੰਕ ਜਾਂ 5 ਫੀਸਦੀ ਡਿੱਗਿਆ।

ਰੁਪੱਈਆ ਅਮਰੀਕੀ ਡਾਲਰ ਦੇ ਮੁਕਾਬਲੇ 94.78 ’ਤੇ ਹੋਇਆ ਬੰਦ

ਇਰਾਨ ਦੀ ਜੰਗ ਦੇ ਤੇਜ਼ ਹੋਣ ਕਾਰਨ ਸੋਮਵਾਰ ਨੂੰ ਕਾਰੋਬਾਰ ਦੌਰਾਨ ਰੁਪਿਆ 95/USD ਦੇ ਪੱਧਰ ਨੂੰ ਪਾਰ ਕਰ ਗਿਆ ਅਤੇ ਅੰਤ ਵਿੱਚ ਅਮਰੀਕੀ ਮੁਦਰਾ ਦੇ ਮੁਕਾਬਲੇ 94.78 (ਆਰਜ਼ੀ) ’ਤੇ ਬੰਦ ਹੋਇਆ।

ਵਿਦੇਸ਼ੀ ਮੁਦਰਾ ਵਪਾਰੀਆਂ ਨੇ ਕਿਹਾ ਕਿ ਪੱਛਮੀ ਏਸ਼ੀਆ ਸੰਕਟ ਦੇ 31ਵੇਂ ਦਿਨ ਵਿੱਚ ਪ੍ਰਵੇਸ਼ ਕਰਨ ਅਤੇ ਊਰਜਾ ਬਾਜ਼ਾਰਾਂ ਵਿੱਚ ਬਣੀ ਘਬਰਾਹਟ ਕਾਰਨ USD/INR ਦੀ ਜੋੜੀ ਵਿੱਚ ਭਾਰੀ ਉਤਰਾਅ-ਚੜ੍ਹਾਅ ਦੇਖਿਆ ਗਿਆ ਅਤੇ ਦਿਨ ਦੇ ਕਾਰੋਬਾਰ ਦੌਰਾਨ ਇਹ 165 ਪੈਸੇ ਤੱਕ ਹੇਠਾਂ-ਉੱਪਰ ਹੋਇਆ।

ਅੰਤਰ-ਬੈਂਕ ਵਿਦੇਸ਼ੀ ਮੁਦਰਾ ਬਾਜ਼ਾਰ ਵਿੱਚ ਰੁਪਿਆ 93.62 ’ਤੇ ਖੁੱਲ੍ਹਿਆ ਅਤੇ ਫਿਰ ਅਮਰੀਕੀ ਡਾਲਰ ਦੇ ਮੁਕਾਬਲੇ 93.57 ਦੇ ਪੱਧਰ ਤੱਕ ਮਜ਼ਬੂਤ ਹੋਇਆ, ਜੋ ਪਿਛਲੀ ਬੰਦ ਕੀਮਤ ਤੋਂ 128 ਪੈਸੇ ਦਾ ਵਾਧਾ ਸੀ। ਸੋਮਵਾਰ ਦੇ ਕਾਰੋਬਾਰੀ ਸੈਸ਼ਨ ਦੇ ਅੰਤ ਵਿੱਚ ਰੁਪੱਈਆ 94.78 (ਆਰਜ਼ੀ) 'ਤੇ ਰਿਹਾ, ਜੋ ਪਿਛਲੀ ਬੰਦ ਕੀਮਤ 94.85 ਦੇ ਮੁਕਾਬਲੇ 7 ਪੈਸੇ ਦੀ ਮਾਮੂਲੀ ਬੜ੍ਹਤ ਦਰਸਾਉਂਦਾ ਹੈ। ਸ਼ੁੱਕਰਵਾਰ ਨੂੰ ਰੁਪਿਆ 89 ਪੈਸੇ ਦੀ ਵੱਡੀ ਗਿਰਾਵਟ ਨਾਲ 94.85 ਦੇ ਇਤਿਹਾਸਕ ਹੇਠਲੇ ਪੱਧਰ 'ਤੇ ਬੰਦ ਹੋਇਆ ਸੀ। (ਪੀ.ਟੀ.ਆਈ.)

Tags :