Share Market: ਰੁਪਿਆ 96.90 ਦੇ ਇਤਿਹਾਸਕ ਹੇਠਲੇ ਪੱਧਰ 'ਤੇ ਡਿੱਗਿਆ; ਸੈਂਸੈਕਸ 75,000 ਅੰਕਾਂ ਤੋਂ ਉੱਪਰ ਬੰਦ ਹੋਇਆ

ਬੁੱਧਵਾਰ ਨੂੰ ਸ਼ੁਰੂਆਤੀ ਕਾਰੋਬਾਰ ਵਿੱਚ ਅਮਰੀਕੀ ਡਾਲਰ ਦੇ ਮੁਕਾਬਲੇ ਰੁਪਿਆ 20 ਪੈਸੇ ਟੁੱਟ ਕੇ 96.90 ਦੇ ਹੁਣ ਤੱਕ ਦੇ ਸਭ ਤੋਂ ਹੇਠਲੇ ਪੱਧਰ 'ਤੇ ਆ ਗਿਆ। ਅਮਰੀਕਾ ਅਤੇ ਇਰਾਨ ਦਰਮਿਆਨ ਵਧਦੇ ਤਣਾਅ ਕਾਰਨ ਮਜ਼ਬੂਤ ਹੁੰਦੇ ਡਾਲਰ ਅਤੇ ਕੱਚੇ ਤੇਲ ਦੀਆਂ ਵਧਦੀਆਂ ਕੀਮਤਾਂ ਨੇ ਰੁਪਏ 'ਤੇ ਦਬਾਅ ਪਾਇਆ ਹੈ।

ਫੋਰੈਕਸ (ਵਿਦੇਸ਼ੀ ਮੁਦਰਾ) ਕਾਰੋਬਾਰੀਆਂ ਦੇ ਅਨੁਸਾਰ, ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕਾਂ (FIIs) ਵੱਲੋਂ ਪੈਸਾ ਬਾਹਰ ਕੱਢਣ ਅਤੇ ਸ਼ੇਅਰ ਬਾਜ਼ਾਰ ਦੇ ਮੁੱਖ ਸੂਚਕ ਅੰਕ ਵਿੱਚ ਗਿਰਾਵਟ ਕਾਰਨ ਵੀ ਰੁਪਿਆ ਕਮਜ਼ੋਰ ਹੋਇਆ ਹੈ।

ਇੰਟਰਬੈਂਕ ਵਿਦੇਸ਼ੀ ਮੁਦਰਾ ਬਾਜ਼ਾਰ ਵਿੱਚ, ਰੁਪਿਆ ਅਮਰੀਕੀ ਡਾਲਰ ਦੇ ਮੁਕਾਬਲੇ 96.89 'ਤੇ ਖੁੱਲ੍ਹਿਆ ਅਤੇ ਫਿਰ ਹੋਰ ਹੇਠਾਂ ਡਿੱਗ ਕੇ 96.90 'ਤੇ ਪਹੁੰਚ ਗਿਆ, ਜਿਸ ਨਾਲ ਪਿਛਲੇ ਕਾਰੋਬਾਰੀ ਦਿਨ ਦੇ ਮੁਕਾਬਲੇ ਰੁਪਏ ਦੀ ਕੀਮਤ ਵਿੱਚ ਕੁੱਲ 20 ਪੈਸੇ ਦੀ ਵੱਡੀ ਗਿਰਾਵਟ ਦੇਖਣ ਨੂੰ ਮਿਲੀ।

ਦੂਜੇ ਪਾਸੇ, ਸ਼ੇਅਰ ਬਾਜ਼ਾਰ ਵਿੱਚ ਤੇਜ਼ੀ ਦੇਖਣ ਨੂੰ ਮਿਲੀ, ਜਿੱਥੇ ਸੈਂਸੈਕਸ 117.54 ਅੰਕ (ਯਾਨੀ 0.16 ਫ਼ੀਸਦੀ) ਦੇ ਵਾਧੇ ਨਾਲ 75,318.39 'ਤੇ ਜਾ ਕੇ ਬੰਦ ਹੋਇਆ। ਇਸੇ ਤਰ੍ਹਾਂ ਨਿਫਟੀ ਵੀ 41 ਅੰਕ (ਯਾਨੀ 0.17 ਫ਼ੀਸਦੀ) ਉੱਪਰ ਚੜ੍ਹ ਕੇ 23,659.00 ਦੇ ਪੱਧਰ 'ਤੇ ਬੰਦ ਹੋਇਆ।

ਬਜਾਜ ਬ੍ਰੋਕਿੰਗ ਮਾਰਕੀਟ ਕਮੈਂਟਰੀ ਦੇ ਅਨੁਸਾਰ, ਸੈਕਟਰਾਂ ਦੇ ਪੱਧਰ 'ਤੇ ਬਾਜ਼ਾਰ ਵਿੱਚ ਰਲਿਆ-ਮਿਲਿਆ ਰੁਝਾਨ ਦੇਖਣ ਨੂੰ ਮਿਲਿਆ। ਖਰੀਦਦਾਰੀ ਵਿੱਚ ਜ਼ਿਆਦਾਤਰ ਦਿਲਚਸਪੀ ਨਿਫਟੀ ਆਇਲ ਐਂਡ ਗੈਸ, ਆਟੋ, ਰੀਅਲਟੀ ਅਤੇ ਬੈਂਕਿੰਗ ਸ਼ੇਅਰਾਂ ਵਿੱਚ ਦੇਖੀ ਗਈ, ਜਦੋਂ ਕਿ ਨਿਫਟੀ ਮੀਡੀਆ, ਆਈ ਟੀ  (IT) ਅਤੇ ਐੱਫ ਐੱਮ ਸੀ ਜੀ (FMCG) ਸੂਚਕ ਅੰਕ ਇਸ ਸੈਸ਼ਨ ਦੌਰਾਨ ਪਛੜ ਗਏ।