Market Update: ਅਮਰੀਕੀ ਡਾਲਰ ਦੇ ਮੁਕਾਬਲੇ ਰੁਪਏ ’ਚ 1.6% ਦਾ ਵਾਧਾ; ਸੈਂਸੈਕਸ 1,433 ਅੰਕ ਡਿੱਗਿਆ

Market Update:  ਮੁੰਬਈ ਵਿੱਚ ਵੀਰਵਾਰ ਨੂੰ ਭਾਰਤੀ ਰੁਪਏ ਨੇ ਆਪਣੀ ਇਤਿਹਾਸਕ ਗਿਰਾਵਟ ਤੋਂ ਉੱਭਰਦਿਆਂ 151 ਪੈਸੇ ਦੀ ਸ਼ਾਨਦਾਰ ਰਿਕਵਰੀ ਦਰਜ ਕੀਤੀ। ਰਿਜ਼ਰਵ ਬੈਂਕ (RBI) ਵੱਲੋਂ ਬੈਂਕਾਂ ਦੀ ਨੈੱਟ ਓਪਨ ਪੋਜੀਸ਼ਨ ’ਤੇ 100 ਮਿਲੀਅਨ ਡਾਲਰ ਦੀ ਸੀਮਾ ਤੈਅ ਕਰਨ ਦੇ ਫੈਸਲੇ ਤੋਂ ਬਾਅਦ ਰੁਪਿਆ 93.19 ਦੇ ਪੱਧਰ ’ਤੇ ਆ ਗਿਆ।

ਪਿਛਲੇ ਸ਼ੁੱਕਰਵਾਰ ਨੂੰ ਰੁਪਿਆ 94.84 ਦੇ ਰਿਕਾਰਡ ਹੇਠਲੇ ਪੱਧਰ ’ਤੇ ਬੰਦ ਹੋਇਆ ਸੀ, ਜਿਸ ਤੋਂ ਬਾਅਦ ਕੇਂਦਰੀ ਬੈਂਕ ਨੂੰ ਦਖਲ ਦੇਣਾ ਪਿਆ। ਹਾਲਾਂਕਿ, ਵਿਦੇਸ਼ੀ ਨਿਵੇਸ਼ਕਾਂ ਵੱਲੋਂ ਲਗਾਤਾਰ ਪੂੰਜੀ ਕੱਢਣ ਅਤੇ ਕੱਚੇ ਤੇਲ ਦੀਆਂ ਵਧਦੀਆਂ ਕੀਮਤਾਂ (106.06 ਡਾਲਰ ਪ੍ਰਤੀ ਬੈਰਲ) ਕਾਰਨ ਕਰੰਸੀ ’ਤੇ ਦਬਾਅ ਅਜੇ ਵੀ ਬਣਿਆ ਹੋਇਆ ਹੈ।

ਸ਼ੇਅਰ ਬਾਜ਼ਾਰ ਦਾ ਹਾਲ

ਦੂਜੇ ਪਾਸੇ, ਘਰੇਲੂ ਸ਼ੇਅਰ ਬਾਜ਼ਾਰ ਵਿੱਚ ਅੱਜ ਭਾਰੀ ਗਿਰਾਵਟ ਦੇਖਣ ਨੂੰ ਮਿਲੀ। ਸੈਂਸੈਕਸ ਲਗਭਗ 1,414 ਅੰਕ ਡਿੱਗ ਕੇ 71,719 ’ਤੇ ਅਤੇ ਨਿਫਟੀ 440 ਅੰਕਾਂ ਦੀ ਗਿਰਾਵਟ ਨਾਲ 22,238 ਦੇ ਪੱਧਰ ’ਤੇ ਖੁੱਲ੍ਹਿਆ।

ਮਾਹਰਾਂ ਅਨੁਸਾਰ, 28 ਫਰਵਰੀ 2026 ਤੋਂ ਪੱਛਮੀ ਏਸ਼ੀਆ ਵਿੱਚ ਸ਼ੁਰੂ ਹੋਈ ਜੰਗ ਕਾਰਨ ਰੁਪਿਆ ਹੁਣ ਤੱਕ 4% ਤੋਂ ਵੱਧ ਟੁੱਟ ਚੁੱਕਾ ਹੈ। ਹਾਲਾਂਕਿ, ਆਰਥਿਕ ਮੋਰਚੇ ਤੋਂ ਇੱਕ ਰਾਹਤ ਵਾਲੀ ਖ਼ਬਰ ਇਹ ਰਹੀ ਕਿ ਮਾਰਚ ਮਹੀਨੇ ਵਿੱਚ GST ਸੰਗ੍ਰਹਿ 9 ਫੀਸਦ ਵਧ ਕੇ 2 ਲੱਖ ਕਰੋੜ ਰੁਪਏ ਤੋਂ ਪਾਰ ਹੋ ਗਿਆ ਹੈ, ਜੋ ਕਿ ਵਿੱਤੀ ਸਾਲ 2025-26 ਦਾ ਤੀਜਾ ਸਭ ਤੋਂ ਵੱਡਾ ਸੰਗ੍ਰਹਿ ਹੈ।