ਆਲਮੀ ਤਕਨਾਲੋਜੀ ਮੰਚ ’ਤੇ ਭਾਰਤੀ ਕੰਪਨੀਆਂ ਦੀ ਮੌਜੂਦਗੀ ਵਧੀ

ਭਾਰਤੀ ਕੰਪਨੀਆਂ ਅਤੇ ਸਟਾਰਟਅੱਪਸ ਦੀ ਮੌਜੂਦਗੀ ਆਲਮੀ ਤਕਨਾਲੋਜੀ ਪਲੈਟਫਾਰਮ ਸੀ ਈ ਐੱਸ (ਖਪਤਕਾਰ ਇਲੈਕਟ੍ਰੌਨਿਕਸ ਸ਼ੋਅ) ’ਤੇ ਲਗਾਤਾਰ ਵਧ ਰਹੀ ਹੈ। ਦੁਨੀਆ ਦੀ ਸਭ ਤੋਂ ਵੱਡੀ ਤਕਨਾਲੋਜੀ ਪ੍ਰਦਰਸ਼ਨੀ ਦੇ ਮੀਤ ਪ੍ਰਧਾਨ ਅਤੇ ਸ਼ੋਅ ਦੇ ਡਾਇਰੈਕਟਰ ਜੌਹਨ ਕੈਲੀ ਨੇ ਕਿਹਾ ਕਿ ਉਹ ਪ੍ਰਦਰਸ਼ਨੀ ’ਚ ਸਾਰਿਆਂ ਦਾ ਸਵਾਗਤ ਕਰਦੇ ਹਨ। ਕੈਲੀ ਨੇ ਇਥੇ ਪ੍ਰੈੱਸ ਕਾਨਫਰੰਸ ਦੌਰਾਨ ਖ਼ਬਰ ਏਜੰਸੀ ਪੀ ਟੀ ਆਈ ਵੱਲੋਂ ਪੁੱਛੇ ਗਏ ਸਵਾਲ ਦੇ ਜਵਾਬ ’ਚ ਕਿਹਾ ਕਿ ਸੀ ਈ ਐੱਸ ’ਚ ਭਾਰਤੀ ਕੰਪਨੀਆਂ ਦੀ ਮੌਜੂਦਗੀ ਲਗਾਤਾਰ ਵਧ ਰਹੀ ਹੈ। ਕੈਲੀ ਨੇ ਬੰਗਲੌਰ ਆਧਾਰਿਤ ਤਕਨਾਲੋਜੀ ਅਤੇ ਸਰੀਰ ’ਤੇ ਲੱਗਣ ਵਾਲੇ ਉਪਕਰਨ ਬਣਾਉਣ ਵਾਲੀ ਕੰਪਨੀ ਅਲਟਰਾ ਹਿਊਮਨ ਦਾ ਉਚੇਚੇ ਤੌਰ ’ਤੇ ਜ਼ਿਕਰ ਕੀਤਾ। ਅਲਟਰਾ ਹਿਊਮਨ ਦੇ ਉਤਪਾਦਾਂ ’ਚ ਦੁਨੀਆ ਦਾ ਸਭ ਤੋਂ ਹਲਕਾ ਨੀਂਦ ਦਾ ਪਤਾ ਲਗਾਉਣ ਵਾਲਾ ਉਪਕਰਨ ਅਤੇ ਗਲੂਕੋਜ਼ ਨਿਗਰਾਨੀ ਪਲੈਟਫਾਰਮ ਸ਼ਾਮਲ ਹਨ। ਕੈਲੀ ਨੇ ਕਿਹਾ ਕਿ ਇਸ ਸਾਲ ਸੀ ਈ ਐੱਸ ’ਚ ਕਰੀਬ 150 ਮੁਲਕ ਹਿੱਸਾ ਲੈ ਰਹੇ ਹਨ ਅਤੇ ਇਨ੍ਹਾਂ ’ਚੋਂ ਕਰੀਬ 40 ਫ਼ੀਸਦੀ ਕੰਪਨੀਆਂ ਅਮਰੀਕਾ ਤੋਂ ਬਾਹਰਲੇ ਮੁਲਕਾਂ ਦੀਆਂ ਹਨ। ਖਪਤਕਾਰ ਤਕਨਾਲੋਜੀ ਐਸੋਸੀਏਸ਼ਨ (ਸੀ ਟੀ ਏ) ਵੱਲੋਂ ਕਰਵਾਈ ਜਾ ਰਹੀ ਸੀ ਈ ਐੱਸ 2026 ਮੰਗਲਵਾਰ ਤੋਂ ਸ਼ੁਰੂ ਹੋਈ ਜੋ 9 ਜਨਵਰੀ ਤੱਕ ਜਾਰੀ ਰਹੇਗੀ। ਪ੍ਰਦਰਸ਼ਨੀ ’ਚ 4100 ਤੋਂ ਜ਼ਿਆਦਾ ਕੰਪਨੀਆਂ ਏ ਆਈ, ਡਿਜੀਟਲ ਸਿਹਤ, ਊਰਜਾ, ਮਨੋਰੰਜਨ, ਗਤੀਸ਼ੀਲਤਾ, ਰੋਬੋਟਿਕਸ ਤੋਂ ਇਲਾਵਾ ਹੋਰ ਕਾਢਾਂ ਦੀ ਨੁਮਾਇਸ਼ ਕਰ ਰਹੀਆਂ ਹਨ।