Gold Price: ਅਮਰੀਕਾ-ਇਰਾਨ ਸਮਝੌਤੇ ਦੀਆਂ ਉਮੀਦਾਂ ਨੇ ਘਟਾਇਆ ਮਹਿੰਗਾਈ ਦਾ ਡਰ; ਸੋਨੇ ਦੀਆਂ ਕੀਮਤਾਂ ’ਚ ਮਾਮੂਲੀ ਸੁਧਾਰ
ਕੱਚੇ ਤੇਲ ਦੀਆਂ ਕੀਮਤਾਂ ਡਿੱਗਣ ਕਾਰਨ ਬੈਂਕਾਂ ਵੱਲੋਂ ਵਿਆਜ ਦਰਾਂ ਵਧਾਉਣ ਦਾ ਖ਼ਦਸ਼ਾ ਹੋਇਆ ਘੱਟ।
Gold Price: ਵਿਸ਼ਵ ਬਾਜ਼ਾਰ ਵਿੱਚ ਸ਼ੁੱਕਰਵਾਰ ਨੂੰ ਸੋਨੇ ਦੀਆਂ ਕੀਮਤਾਂ ਵਿੱਚ ਮਾਮੂਲੀ ਵਾਧਾ ਦਰਜ ਕੀਤਾ ਗਿਆ ਹੈ। ਨਿਵੇਸ਼ਕਾਂ ਵੱਲੋਂ ਅਮਰੀਕਾ ਅਤੇ ਇਰਾਨ ਵਿਚਾਲੇ ਇੱਕ ਸੰਭਾਵੀ ਸ਼ਾਂਤੀ ਸਮਝੌਤੇ ਦੀਆਂ ਖ਼ਬਰਾਂ ਅਤੇ ਮਹਿੰਗਾਈ ’ਤੇ ਇਸ ਦੇ ਪੈਣ ਵਾਲੇ ਪ੍ਰਭਾਵਾਂ ਦਾ ਮੁਲਾਂਕਣ ਕੀਤਾ ਜਾ ਰਿਹਾ ਹੈ। ਹਾਲਾਂਕਿ, ਇਸ ਸੁਧਾਰ ਦੇ ਬਾਵਜੂਦ ਸੋਨਾ ਹਫ਼ਤਾਵਾਰੀ ਆਧਾਰ ’ਤੇ ਘਾਟੇ ਵੱਲ ਵਧ ਰਿਹਾ ਹੈ। ਕੌਮਾਂਤਰੀ ਬਾਜ਼ਾਰ ਵਿੱਚ ਹਾਜ਼ਿਰ ਸੋਨਾ (Spot Gold) 0.2 ਫ਼ੀਸਦੀ ਦੇ ਵਾਧੇ ਨਾਲ 4,220.27 ਡਾੱਲਰ ਪ੍ਰਤੀ ਔਂਸ (Ounce) ’ਤੇ ਪਹੁੰਚ ਗਿਆ, ਪਰ ਇਸ ਦੇ ਬਾਵਜੂਦ ਇਹ ਪੂਰੇ ਹਫ਼ਤੇ ਵਿੱਚ 2 ਫ਼ੀਸਦੀ ਤੋਂ ਵੱਧ ਦੀ ਗਿਰਾਵਟ ਦੇ ਰਾਹ ’ਤੇ ਹੈ। ਦੂਜੇ ਪਾਸੇ, ਸੋਨਾ ਵਾਅਦਾ (Gold Futures) 3.1 ਫ਼ੀਸਦੀ ਦੀ ਵੱਡੀ ਤੇਜ਼ੀ ਨਾਲ 4,241.51 ਡਾੱਲਰ ਪ੍ਰਤੀ ਔਂਸ ’ਤੇ ਬੰਦ ਹੋਇਆ।
ਪ੍ਰਸਤਾਵਿਤ ਸਮਝੌਤੇ ਨਾਲ ਊਰਜਾ ਬਾਜ਼ਾਰ ਨੂੰ ਮਿਲੇਗੀ ਰਾਹਤ
ਰਿਪੋਰਟਾਂ ਅਨੁਸਾਰ, ਵਾਸ਼ਿੰਗਟਨ ਅਤੇ ਤਹਿਰਾਨ ਵਿਚਾਲੇ ਹੋਣ ਵਾਲੇ ਸੰਭਾਵੀ ਸਮਝੌਤੇ ਤਹਿਤ ਇਰਾਨ ‘ਹੋਰਮੁਜ਼ ਜਲਡਮਰੂ (Strait of Hormuz)ਨੂੰ ਦੁਬਾਰਾ ਖੋਲ੍ਹਣ ਲਈ ਸਹਿਮਤ ਹੋ ਸਕਦਾ ਹੈ। ਬਦਲੇ ਵਿੱਚ, ਅਮਰੀਕਾ ਇਰਾਨੀ ਤੇਲ ਦੇ ਬਰਾਮਦ ’ਤੇ ਲਗਾਈਆਂ ਗਈਆਂ ਪਾਬੰਦੀਆਂ ਨੂੰ ਹਟਾ ਦੇਵੇਗਾ।
ਕੱਚੇ ਤੇਲ ਦੀਆਂ ਕੀਮਤਾਂ ਡਿੱਗਣ ਨਾਲ ਮਹਿੰਗਾਈ ਦਾ ਡਰ ਹੋਇਆ ਘੱਟ
ਕੂਟਨੀਤਕ ਗੱਲਬਾਤ ਦੇ ਹਾਂ-ਪੱਖੀ ਸੰਕੇਤਾਂ ਕਾਰਨ ਕੱਚੇ ਤੇਲ ਦੇ ਬਾਜ਼ਾਰ ਵਿੱਚ ਵੱਡੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ। ਕੌਮਾਂਤਰੀ ਬੈਂਚਮਾਰਕ ਬ੍ਰੈਂਟ ਕਰੂਡ (Brent Crude) 4.3 ਫ਼ੀਸਦੀ ਡਿੱਗ ਕੇ 86.47 ਡਾੱਲਰ ਪ੍ਰਤੀ ਬੈਰਲ ’ਤੇ ਆ ਗਿਆ ਹੈ, ਜੋ ਵੀਰਵਾਰ ਨੂੰ 90 ਡਾੱਲਰ ਤੋਂ ਹੇਠਾਂ ਖਿਸਕ ਗਿਆ ਸੀ।
ਇਹ ਗਿਰਾਵਟ ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਦੇ ਉਸ ਬਿਆਨ ਤੋਂ ਬਾਅਦ ਆਈ ਹੈ, ਜਿਸ ਵਿੱਚ ਉਨ੍ਹਾਂ ਨੇ ਸੰਕੇਤ ਦਿੱਤਾ ਸੀ ਕਿ ਪਿਛਲੇ ਚਾਰ ਮਹੀਨਿਆਂ ਤੋਂ ਚੱਲ ਰਿਹਾ ਇਰਾਨ ਸੰਘਰਸ਼ ਹੁਣ ਖ਼ਤਮ ਹੋਣ ਦੇ ਨੇੜੇ ਹੈ। ਤੇਲ ਦੀਆਂ ਕੀਮਤਾਂ ਘਟਣ ਨਾਲ ਵਿਸ਼ਵ ਭਰ ਦੇ ਕੇਂਦਰੀ ਬੈਂਕਾਂ ’ਤੇ ਵਿਆਜ ਦਰਾਂ ਨੂੰ ਹੋਰ ਵਧਾਉਣ (Monetary Tightening) ਦਾ ਦਬਾਅ ਘਟੇਗਾ, ਕਿਉਂਕਿ ਉੱਚੀਆਂ ਵਿਆਜ ਦਰਾਂ ਆਮ ਤੌਰ ’ਤੇ ਸੋਨੇ ਵਰਗੇ ਗੈਰ-ਵਿਆਜ ਵਾਲੇ ਨਿਵੇਸ਼ਾਂ ਦੀ ਖਿੱਚ ਨੂੰ ਘਟਾ ਦਿੰਦੀਆਂ ਹਨ।
