CBDT ਨੇ ITR ਦਾਖ਼ਲ ਕਰਨ ਦੀ ਆਖ਼ਰੀ ਮਿਤੀ 21 ਨਵੰਬਰ ਤੱਕ ਵਧਾਈ

ਸੈਂਟਰਲ ਬੋਰਡ ਆਫ਼ ਡਾਇਰੈਕਟ ਟੈਕਸੇਜ਼ (ਸੀ.ਬੀ.ਡੀ.ਟੀ.) ਨੇ ਸੋਮਵਾਰ ਨੂੰ ਮੁਲਾਂਕਣ ਸਾਲ (ਏ.ਵਾਈ.) 2026-27 ਲਈ ਇਨਕਮ ਟੈਕਸ ਰਿਟਰਨਾਂ (ਆਈ.ਟੀ.ਆਰ.) ਜਮ੍ਹਾਂ ਕਰਵਾਉਣ ਦੀ ਆਖ਼ਰੀ ਮਿਤੀ ਉਨ੍ਹਾਂ ਟੈਕਸਦਾਤਿਆਂ ਲਈ ਵਧਾ ਦਿੱਤੀ ਹੈ, ਜਿਨ੍ਹਾਂ ਦੇ ਖਾਤਿਆਂ ਦਾ ਇਨਕਮ ਟੈਕਸ ਐਕਟ, 1961 ਤਹਿਤ ਆਡਿਟ ਹੋਣਾ ਲਾਜ਼ਮੀ ਹੈ।

ਸੀ.ਬੀ.ਡੀ.ਟੀ. ਵੱਲੋਂ ਜਾਰੀ ਬਿਆਨ ਅਨੁਸਾਰ, ਪਹਿਲਾਂ ਇਹ ਆਖ਼ਰੀ ਮਿਤੀ 31 ਅਕਤੂਬਰ 2026 ਤੈਅ ਕੀਤੀ ਗਈ ਸੀ, ਜਿਸ ਨੂੰ ਹੁਣ 21 ਦਿਨ ਅੱਗੇ ਵਧਾ ਕੇ 21 ਨਵੰਬਰ 2026 ਕਰ ਦਿੱਤਾ ਗਿਆ ਹੈ। ਟੈਕਸ ਵਿਭਾਗ ਨੇ ਮੁਲਾਂਕਣ ਸਾਲ 2026-27 ਲਈ ਇਨਕਮ ਟੈਕਸ ਐਕਟ ਤਹਿਤ ਆਡਿਟ ਰਿਪੋਰਟ ਜਮ੍ਹਾਂ ਕਰਵਾਉਣ ਦੀ ਮਿਤੀ ਵਿੱਚ ਵੀ ਵਾਧਾ ਕੀਤਾ ਹੈ। ਆਡਿਟ ਰਿਪੋਰਟ ਲਈ ਪਹਿਲਾਂ ਆਖ਼ਰੀ ਮਿਤੀ 30 ਸਤੰਬਰ 2026 ਨਿਰਧਾਰਤ ਕੀਤੀ ਗਈ ਸੀ, ਜਿਸ ਨੂੰ ਹੁਣ ਵਧਾ ਕੇ 21 ਅਕਤੂਬਰ 2026 ਕਰ ਦਿੱਤਾ ਗਿਆ ਹੈ।

ਕਈ ਚਾਰਟਰਡ ਅਕਾਊਂਟੈਂਟ ਸੰਸਥਾਵਾਂ ਅਤੇ ਟੈਕਸ ਮਾਹਿਰਾਂ ਨੇ ਸਰਕਾਰ ਨੂੰ ਅਪੀਲ ਕੀਤੀ ਸੀ ਕਿ ਆਡਿਟ ਪੂਰਾ ਕਰਨ ਅਤੇ ਵਿੱਤੀ ਤੇ ਟੈਕਸ ਨਾਲ ਜੁੜੇ ਅੰਕੜਿਆਂ ਦਾ ਮਿਲਾਨ ਕਰਨ ਵਿੱਚ ਲੱਗਦੇ ਸਮੇਂ ਨੂੰ ਧਿਆਨ ਵਿੱਚ ਰੱਖਦਿਆਂ ਆਖ਼ਰੀ ਮਿਤੀ ਵਧਾਈ ਜਾਵੇ। ਹਾਲ ਹੀ ਦੇ ਹਫ਼ਤਿਆਂ ਵਿੱਚ ਮਿਤੀ ਵਧਾਉਣ ਦੀ ਮੰਗ ਲਗਾਤਾਰ ਵਧ ਰਹੀ ਸੀ, ਕਿਉਂਕਿ ਪੇਸ਼ੇਵਰ ਸੰਸਥਾਵਾਂ ਨੇ ਮਿਤੀ ਨੂੰ 31 ਅਕਤੂਬਰ ਤੱਕ ਵਧਾਉਣ ਦੀ ਮੰਗ ਕੀਤੀ ਸੀ। ਟੈਕਸ ਮਾਹਿਰਾਂ ਨੇ ਵੀ ਆਡਿਟ ਪ੍ਰਕਿਰਿਆ ਪੂਰੀ ਕਰਨ, ਜਾਣਕਾਰੀ ਦੀ ਪੁਸ਼ਟੀ ਕਰਨ ਅਤੇ ਵੱਖ-ਵੱਖ ਟੈਕਸ ਅਤੇ ਵਿੱਤੀ ਦਸਤਾਵੇਜ਼ਾਂ ਵਿੱਚ ਮੌਜੂਦ ਜਾਣਕਾਰੀ ਦਾ ਮੇਲ ਕਰਨ ਲਈ ਲੋੜੀਂਦੇ ਸਮੇਂ ਬਾਰੇ ਚਿੰਤਾ ਪ੍ਰਗਟਾਈ ਸੀ।

ਇਸ ਵਾਧੇ ਕਾਰਨ ਟੈਕਸਦਾਤਿਆਂ ਅਤੇ ਉਨ੍ਹਾਂ ਦੇ ਆਡਿਟਰਾਂ ਦੋਵਾਂ ਕੋਲ ਆਡਿਟ ਪ੍ਰਕਿਰਿਆ ਨੂੰ ਅੰਤਿਮ ਰੂਪ ਦੇਣ ਅਤੇ ਇਨਕਮ ਟੈਕਸ ਦੇ ਈ-ਫਾਇਲਿੰਗ ਪੋਰਟਲ ’ਤੇ ਜ਼ਰੂਰੀ ਰਿਪੋਰਟ ਜਮ੍ਹਾਂ ਕਰਵਾਉਣ ਲਈ ਵਾਧੂ ਸਮਾਂ ਮਿਲ ਜਾਵੇਗਾ।ਟੈਕਸ ਆਡਿਟ ਪਾਲਣਾ ਵਿੱਚ ਰਿਪੋਰਟ ਪੂਰੀ ਹੋਣ ਤੋਂ ਪਹਿਲਾਂ ਕਈ ਤਰ੍ਹਾਂ ਦੀਆਂ ਤਸਦੀਕਾਂ ਸ਼ਾਮਲ ਹੁੰਦੀਆਂ ਹਨ। ਟੈਕਸਦਾਤਿਆਂ ਅਤੇ ਆਡਿਟਰਾਂ ਲਈ ਟਰਨਓਵਰ ਅਤੇ ਹੋਰ ਵਿੱਤੀ ਵੇਰਵਿਆਂ ਦਾ ਜੀ.ਐੱਸ.ਟੀ. ਰਿਟਰਨਾਂ ਨਾਲ ਮਿਲਾਨ ਕਰਨਾ, ਟੀ.ਡੀ.ਐੱਸ. ਅਤੇ ਟੀ.ਸੀ.ਐੱਸ. ਦੇ ਅੰਕੜਿਆਂ ਦੀ ਪੁਸ਼ਟੀ ਕਰਨਾ ਅਤੇ ਫਾਰਮ 26ਏ.ਐੱਸ., ਸਾਲਾਨਾ ਸੂਚਨਾ ਸਟੇਟਮੈਂਟ (ਏ.ਆਈ.ਐੱਸ.) ਅਤੇ ਟੈਕਸਦਾਤਾ ਸੂਚਨਾ ਸੰਖੇਪ (ਟੀ.ਆਈ.ਐੱਸ.) ਵਿੱਚ ਮੌਜੂਦ ਜਾਣਕਾਰੀ ਦੀ ਸਮੀਖਿਆ ਕਰਨਾ ਜ਼ਰੂਰੀ ਹੁੰਦਾ ਹੈ।

ਇਸ ਤੋਂ ਇਲਾਵਾ ਖਰਚੇ, ਚੱਲ-ਅਚੱਲ ਜਾਇਦਾਦਾਂ, ਕਰਜ਼ੇ, ਕਾਨੂੰਨੀ ਜ਼ਿੰਮੇਵਾਰੀਆਂ, ਸਬੰਧਤ ਧਿਰਾਂ ਨਾਲ ਲੈਣ-ਦੇਣ ਅਤੇ ਹੋਰ ਖੁਲਾਸਿਆਂ ਦੀ ਵੀ ਜਾਂਚ ਕਰਨੀ ਪੈਂਦੀ ਹੈ। ਰਿਪੋਰਟ ਜਮ੍ਹਾਂ ਕਰਵਾਉਣ ਤੋਂ ਪਹਿਲਾਂ ਕਿਸੇ ਵੀ ਤਰ੍ਹਾਂ ਦੀ ਅਸੰਗਤਤਾ ਜਾਂ ਅਧੂਰੀ ਜਾਣਕਾਰੀ ਲਈ ਵਾਧੂ ਪੜਤਾਲ ਦੀ ਲੋੜ ਪੈ ਸਕਦੀ ਹੈ।