2,000 ਰੁਪਏ ਦੇ 98.45 ਫੀਸਦੀ ਨੋਟ ਬੈਂਕਾਂ ਕੋਲ ਵਾਪਸ ਆਏ: RBI
ਹੁਣ ਸਿਰਫ਼ 5,501 ਕਰੋੜ ਰੁਪਏ ਦੇ ਨੋਟ ਰਹਿ ਗਏ ਬਾਜ਼ਾਰ ਵਿੱਚ; ਅਜੇ ਵੀ LEGAL TENDER ਹਨ ਇਹ ਨੋਟ
ਭਾਰਤੀ ਰਿਜ਼ਰਵ ਬੈਂਕ (RBI) ਨੇ ਬੁੱਧਵਾਰ ਨੂੰ ਜਾਣਕਾਰੀ ਸਾਂਝੀ ਕੀਤੀ ਹੈ ਕਿ ਚਲਣ ਵਿੱਚ ਮੌਜੂਦ 2,000 ਰੁਪਏ ਦੇ 98.45 ਫੀਸਦੀ ਨੋਟ ਹੁਣ ਤੱਕ ਵਾਪਸ ਆ ਚੁੱਕੇ ਹਨ। ਕੇਂਦਰੀ ਬੈਂਕ ਨੇ 19 ਮਈ, 2023 ਨੂੰ ਇਨ੍ਹਾਂ ਗੁਲਾਬੀ ਨੋਟਾਂ ਨੂੰ ਚਲਣ ਤੋਂ ਬਾਹਰ ਕਰਨ ਦਾ ਐਲਾਨ ਕੀਤਾ ਸੀ। ਆਰ.ਬੀ.ਆਈ. ਅਨੁਸਾਰ, ਜਿਸ ਸਮੇਂ ਇਨ੍ਹਾਂ ਨੋਟਾਂ ਨੂੰ ਵਾਪਸ ਲੈਣ ਦਾ ਫੈਸਲਾ ਹੋਇਆ ਸੀ, ਉਸ ਵੇਲੇ ਬਾਜ਼ਾਰ ਵਿੱਚ 3.56 ਲੱਖ ਕਰੋੜ ਰੁਪਏ ਦੇ 2,000 ਦੇ ਨੋਟ ਮੌਜੂਦ ਸਨ, ਜੋ 31 ਮਾਰਚ 2026 ਤੱਕ ਘਟ ਕੇ ਸਿਰਫ਼ 5,501 ਕਰੋੜ ਰੁਪਏ ਰਹਿ ਗਏ ਹਨ।
ਰਿਜ਼ਰਵ ਬੈਂਕ ਨੇ ਦੱਸਿਆ ਕਿ 2,000 ਰੁਪਏ ਦੇ ਨੋਟਾਂ ਨੂੰ ਬਦਲਣ ਜਾਂ ਜਮ੍ਹਾ ਕਰਵਾਉਣ ਦੀ ਸਹੂਲਤ ਅਜੇ ਵੀ ਆਰ.ਬੀ.ਆਈ. ਦੇ 19 ਖੇਤਰੀ ਦਫ਼ਤਰਾਂ ਵਿੱਚ ਉਪਲਬਧ ਹੈ। ਇਸ ਤੋਂ ਇਲਾਵਾ, ਆਮ ਲੋਕ ਦੇਸ਼ ਦੇ ਕਿਸੇ ਵੀ ਡਾਕਖਾਨੇ ਰਾਹੀਂ ਭਾਰਤੀ ਡਾਕ ਸੇਵਾ ਦੀ ਵਰਤੋਂ ਕਰਕੇ ਇਹ ਨੋਟ ਆਰ.ਬੀ.ਆਈ. ਦੇ ਦਫ਼ਤਰਾਂ ਨੂੰ ਭੇਜ ਸਕਦੇ ਹਨ, ਜਿਸ ਤੋਂ ਬਾਅਦ ਇਹ ਰਾਸ਼ੀ ਸਿੱਧੀ ਉਨ੍ਹਾਂ ਦੇ ਬੈਂਕ ਖਾਤਿਆਂ ਵਿੱਚ ਜਮ੍ਹਾ ਕਰ ਦਿੱਤੀ ਜਾਂਦੀ ਹੈ।
ਬੈਂਕ ਨੇ ਇੱਕ ਵਾਰ ਫਿਰ ਸਪੱਸ਼ਟ ਕੀਤਾ ਹੈ ਕਿ ਭਾਵੇਂ ਇਹ ਨੋਟ ਚਲਣ ਵਿੱਚੋਂ ਬਾਹਰ ਕੀਤੇ ਗਏ ਹਨ, ਪਰ ਇਹ ਅਜੇ ਵੀ ਕਾਨੂੰਨੀ ਤੌਰ ’ਤੇ ਵੈਧ (Legal Tender) ਮੁਦਰਾ ਬਣੇ ਹੋਏ ਹਨ।
