ਨਿੱਜੀ ਪੱਤਰ ਪ੍ਰੇਰਕ
ਬਠਿੰਡਾ, 6 ਅਪਰੈਲ
ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਨੇ ਅੱਜ ਗੁੱਜਰ ਭਾਈਚਾਰੇ ਦੇ ਪਰਿਵਾਰਾਂ ਨੂੰ 8 ਲੱਖ ਰੁਪਏ ਦੀ ਆਰਥਿਕ ਮਦਦ ਦੇਣ ਦਾ ਐਲਾਨ ਕੀਤਾ। ਜ਼ਿਕਰਯੋਗ ਹੈ ਕਿ ਪਿਛਲੇ ਦਿਨੀਂ ਗੁਰੂ ਨਾਨਕ ਨਗਰ ਵਿੱਚ ਗੁੱਜਰਾਂ ਦੇ ਘਰਾਂ ਵਿਚ ਅਚਾਨਕ ਲੱਗੀ ਅੱਗ ਨਾਲ 40 ਤੋਂ ਵੱਧ ਬੱਕਰੀਆਂ, ਕਰੀਬ 3 ਲੱਖ ਰੁਪਏ ਨਕਦੀ ਅਤੇ ਸਮੁੱਚਾ ਘਰੇਲੂ ਸਮਾਨ ਸੜ ਗਿਆ ਸੀ। ਪਸ਼ੂ ਪਾਲਕ ਗੁੱਜਰਾਂ ਦੀਆਂ ਦੋ ਧੀਆਂ ਦੇ ਵਿਆਹ ਦੇ ਸਬੰਧ ’ਚ ਘਰ ਵਿਚ ਰੱਖਿਆ ਦਾਜ ਵੀ ਸੜ ਕੇ ਰਾਖ਼ ਹੋ ਗਿਆ ਸੀ। ਇਸ ਤੋਂ ਇਲਾਵਾ ਸ੍ਰੀ ਬਾਦਲ ਸ਼ਹਿਰ ਦੇ ਦੌਰੇ ਦੌਰਾਨ ਸ੍ਰੀ ਜਵਾਲਾ ਮਾਤਾ ਦੇ ਮੰਦਿਰ ਵਿੱਚ ਨਤਮਸਤਕ ਹੋਏ, ਜਿੱਥੇ ਉਨ੍ਹਾਂ ਬ੍ਰਾਹਮਣ ਸਮਾਜ ਏਕਤਾ ਮੰਚ ਦੇ ਮੈਂਬਰਾਂ ਨਾਲ ਮੁਲਾਕਾਤ ਕੀਤੀ। ਮੰਚ ਦੇ ਮੈਂਬਰਾਂ ਨੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਅਤੇ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਦਾ ਪੰਜਾਬ ਸਰਕਾਰ ਵੱਲੋਂ ਬ੍ਰਾਹਮਣ ਕਲਿਆਣ ਬੋਰਡ ਬਣਾਉਣ ’ਤੇ ਧੰਨਵਾਦ ਕੀਤਾ। ਬ੍ਰਾਹਮਣ ਸਮਾਜ ਦੀ ਮੰਗ ਮੁਤਾਬਿਕ ਭਗਵਾਨ ਪਰਸ਼ੂਰਾਮ ਭਵਨ ਅਤੇ ਮੂਰਤੀ ਬਣਾਉਣ ਨੂੰ ਪੂਰਾ ਕਰਦਿਆਂ, ਵਿੱਤ ਮੰਤਰੀ ਨੇ ਨਗਰ ਨਿਗਮ ਦੇ ਅਧਿਕਾਰੀਆਂ ਅਤੇ ਏਡੀਸੀ (ਵਿਕਾਸ) ਨੂੰ ਭਵਨ ਅਤੇ ਬੁੱਤ ਬਣਾਉਣ ਲਈ ਜਗ੍ਹਾ ਦੀ ਨਿਸ਼ਾਨਦੇਹੀ ਕਰਨ ਦੀਆਂ ਹਦਾਇਤਾਂ ਦਿੰਦਿਆਂ ਕੰਮ ਜਲਦੀ ਮੁਕੰਮਲ ਕਰਨ ਲਈ ਕਿਹਾ। ਸ੍ਰੀ ਬਾਦਲ ਨੇ ਹੋਮਲੈਂਡ ਕਲੋਨੀ, ਐਨਐਫਐਲ ਕਲੋਨੀ, ਸੁੱਚਾ ਸਿੰਘ ਨਗਰ, ਕੋਠੇ ਅਮਰਪੁਰਾ, ਮਾਡਲ ਟਾਊਨ ਫੇਸ 4, ਅਜੀਤ ਰੋਡ, ਸ਼ਾਂਤ ਨਗਰ, ਹਾਜੀ ਰਤਨ, ਜੋਗੀ ਨਗਰ, ਵਿਸ਼ਾਲ ਨਗਰ, ਪ੍ਰਤਾਪ ਨਗਰ ਦਾ ਦੌਰਾ ਵੀ ਕੀਤਾ। ਇਸ ਮੌਕੇ ਅਰੁਣ ਵਧਾਵਨ, ਕੇ ਕੇ ਅਗਰਵਾਲ, ਟਹਿਲ ਸਿੰਘ ਸੰਧੂ, ਸੁਖਦੀਪ ਸਿੰਘ, ਪਵਨ ਮਾਨੀ, ਕੰਵਲਜੀਤ ਸਿੰਘ, ਮਲਕੀਤ ਸਿੰਘ, ਪ੍ਰਕਾਸ਼ ਚੰਦ, ਨੱਥੂ ਰਾਮ ਟਰੱਸਟ ਦੇ ਚੇਅਰਮੈਨ ਵੇਦ ਪ੍ਰਕਾਸ਼ ਸ਼ਰਮਾ ਹਾਜ਼ਰ ਸਨ।