ਸ਼ਗਨ ਕਟਾਰੀਆ
ਬਠਿੰਡਾ, 19 ਅਕਤੂਬਰ
ਬਠਿੰਡਾ ਪੁਲੀਸ ਨੇ ਕਥਿਤ ਲੁੱਟ-ਖੋਹ ਦੀਆਂ ਵਾਰਦਾਤਾਂ ਕਰਨ ਵਾਲੇ ਦੋ ਗਰੋਹਾਂ ਨੂੰ ਸਮੇਤ ਲੁੱਟੀ ਹੋਈ ਨਕਦੀ, ਵਾਹਨਾਂ ਅਤੇ ਮਾਰੂ ਹਥਿਆਰਾਂ ਸਮੇਤ ਗ੍ਰਿਫ਼ਤਾਰ ਕੀਤਾ ਹੈ।
ਆਈ.ਜੀ. ਬਠਿੰਡਾ ਜਸਕਰਨ ਸਿੰਘ ਨੇ ਪ੍ਰੈਸ ਕਾਨਫਰੰਸ ਦੌਰਾਨ ਦੱਸਿਆ ਕਿ ਸੀਆਈਏ ਸਟਾਫ਼ ਬਠਿੰਡਾ ਨੇ ਸਾਰਿਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਉਨ੍ਹਾਂ ਦੱਸਿਆ ਕਿ ਲੁੱਟ-ਖੋਹ ਕਰਨ ਵਾਲੇ ਪਹਿਲੇ ਗਰੋਹ ਦੇ ਮੁਲਜ਼ਮਾਂ ’ਚ ਲਵਪ੍ਰੀਤ ਸਿੰਘ ਉਰਫ਼ ਲਵੀ, ਗੋਬਿੰਦ ਸਿੰਘ ਉਰਫ਼ ਕਾਲੂ, ਜਸਵੀਰ ਸਿੰਘ ਉਰਫ਼ ਜੱਸੂ, ਲਛਮਣ ਸਿੰਘ ਉਰਫ਼ ਬੱਬੂ, ਲਵਪ੍ਰੀਤ ਸਿੰਘ ਉਰਫ਼ ਹੈਪੀ ਅਤੇ ਜਗਜੀਤ ਸਿੰਘ ਉਰਫ਼ ਬੱਲੇ-ਬੱਲੇ ਸ਼ਾਮਿਲ ਹਨ। ਉਨ੍ਹਾਂ ਆਖਿਆ ਕਿ ਇਨ੍ਹਾਂ ਕੋਲੋਂ 8 ਮੋਟਰਸਾਈਕਲ, 50 ਹਜ਼ਾਰ ਦੀ ਲੁੱਟ-ਖੋਹ ਦੀ ਰਕਮ, ਪਿਸਤੌਲ ਦੇਸੀ 315 ਬੋਰ ਅਤੇ ਰੌਂਦ, ਇਕ ਏਅਰ ਪਿਸਟਲ, 8 ਮੋਬਾਈਲ ਫ਼ੋਨ, ਇਕ ਕੁਹਾੜੀ, ਕਾਪਾ ਤੇ ਹਾਕੀ ਬਰਾਮਦ ਹੋਈ ਹੈ।
ਉਨ੍ਹਾਂ ਦੱਸਿਆ ਕਿ ਦੂਜੇ ਮਾਮਲੇ ’ਚ ਏਟੀਐੱਮ ਤੇ ਬੈਂਕਾਂ ਲੁੱਟਣ ਵਾਲੇ ਗਰੋਹ ਦੇ ਮੈਂਬਰ ਗ੍ਰਿਫ਼ਤਾਰ ਕੀਤੇ ਗਏ ਹਨ। ਮੁਲਜ਼ਮਾਂ ’ਚ ਕਰਮ ਚੰਦ ਸਿੰਘ ਉਰਫ਼ ਕਨੂੰ, ਅਲੀਸ਼ੇਰ ਉਰਫ਼ ਅਲੀ, ਜੁਗਰਾਜ ਸਿੰਘ ਅਤੇ ਨਿਰਮਲ ਸਿੰਘ ਸ਼ਾਮਿਲ ਹਨ। ਇਨ੍ਹਾਂ ਕੋਲੋਂ ਇਕ ਪਿਸਤੌਲ 315 ਬੋਰ ਦੇਸੀ ਅਤੇ ਰੌਂਦ, ਲੁੱਟ ਦੇ ਡੇਢ ਲੱਖ ਰੁਪਏ, ਏਅਰ ਪਿਸਟਲ, ਕਾਪਾ, ਘੋਪ, ਕਿਰਪਾਨ, ਸੱਬਲ, ਸਕਾਰਪੀਓ ਗੱਡੀ, ਕਾਰ ਹੌਂਡਾ ਸਿਟੀ ਅਤੇ ਗੈਸ ਕਟਰ ਸੈੱਟ ਬਰਾਮਦ ਕੀਤਾ ਗਿਆ। ਦੋਵਾਂ ਮਾਮਲਿਆਂ ’ਚ ਮੁਲਜ਼ਮਾਂ ’ਤੇ ਵੱਖ-ਵੱਖ ਧਾਰਾਵਾਂ ਤਹਿਤ ਕੇਸ ਦਰਜ ਕੀਤੇ ਗਏ ਹਨ।
ਪ੍ਰੈਸ ਸੰਮੇਲਨ ਵਿੱਚ ਐੱਸਐੱਸਪੀ ਬਠਿੰਡਾ ਭੁਪਿੰਦਰਜੀਤ ਸਿੰਘ ਵਿਰਕ, ਐਸਪੀ ਗੁਰਬਿੰਦਰ ਸਿੰਘ, ਡੀਐੱਸਪੀ ਪਰਮਜੀਤ ਸਿੰਘ ਡੋਡ, ਸੀਆਈਏ-2 ਬਠਿੰਡਾ ਦੇ ਮੁਖੀ ਰਜਿੰਦਰ ਕੁਮਾਰ, ਐਸਆਈ ਕੌਰ ਸਿੰਘ ਆਦਿ ਅਧਿਕਾਰੀ ਹਾਜ਼ਰ ਸਨ।