ਪੰਜਾਬ 'ਚ ਅਤਿਵਾਦੀ ਸਾਜ਼ਿਸ਼ ਨਾਕਾਮ: ਭਾਰੀ ਅਸਲੇ ਸਮੇਤ ਦੋ ਮੁਲਜ਼ਮ ਕਾਬੂ

ਅੰਮ੍ਰਿਤਸਰ ਦਿਹਾਤੀ ਪੁਲੀਸ ਨੇ ਪਿੰਡ ਮੁਹਾਵਾ, ਥਾਣਾ ਘਰਿੰਡਾ ਵਿੱਚ 2 ਮੁਲਜਮਾਂ ਨੂੰ ਇਕ ਏ.ਕੇ-47 ਅਸਾਲਟ ਰਾਈਫਲ, ਦੋ ਮੈਗਜੀਨ ਏ.ਕੇ-47, 36 ਰੌਂਦ ਏ.ਕੇ-47, ਤਿੰਨ ਗਲੋਕ ਪਿਸਤੌਲ, ਚਾਰ ਮੈਗਜੀਨ ਅਤੇ ਚਾਰ ਰੌਂਦ ਸਮੇਤ ਗ੍ਰਿਫਤਾਰ ਕੀਤਾ ਹੈ। ਐਸ.ਐਸ.ਪੀ ਦਿਹਾਤੀ ਸੁਹੇਲ ਮੀਰ ਨੇ ਪ੍ਰੈੱਸ ਕਾਨਫਰੰਸ ਵਿੱਚ ਦੱਸਿਆ ਕਿ ਮੁੱਖ ਅਫਸਰ ਥਾਣਾ ਘਰਿੰਡਾ ਨੂੰ ਇੱਕ ਗੁਪਤ ਸੂਚਨਾ ਮਿਲੀ ਸੀ ਕਿ ਵਿਦੇਸ਼ ਵਿੱਚ ਬੈਠੇ ਗੈਂਗਸਟਰ ਗਰੁੱਪ ਵੱਲੋਂ ਪੰਜਾਬ ਵਿੱਚ ਦਹਿਸ਼ਤੀ ਕਾਰਵਾਈਆਂ ਕਰਨ ਲਈ ਪਾਕਿਸਤਾਨ ਰਸਤੇ ਹਥਿਆਰਾ ਦੀ ਖੇਪ ਭੇਜੀ ਗਈ ਹੈ, ਜਿਸ ’ਤੇ ਕਾਰਵਾਈ ਕਰਦੇ ਹੋਏ ਆਦਿਤਿਆ ਵਾਰੀਅਰ (ਐਸਪੀ-ਡੀ) ਦੀ ਨਿਗਰਾਨੀ ਹੇਠ ਡੀ.ਐਸ.ਪੀ ਅਟਾਰੀ, ਡੀ.ਐਸ.ਪੀ-ਡਿਟੈਕਟਿਵ, ਇੰਚਾਰਜ ਸੀ.ਆਈ.ਏ, ਐਸਐਚਓ.ਘਰਿੰਡਾ ਵੱਲੋਂ ਸਾਂਝੇ ਅਪਰੇਸ਼ਨ ਦੌਰਾਨ ਪਿੰਡ ਮੁਹਾਵਾ ਵਿੱਚੋ ਦੋ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕਰਕੇ ਉਹਨਾਂ ਦੇ ਕੋਲੋਂ ਏ.ਕੇ-47 ਅਸਾਲਟ ਰਾਈਫਲ, ਦੋ ਮੈਗਜੀਨ ਏ.ਕੇ-47, 36 ਰੌਂਦ ਏ.ਕੇ-47, ਤਿੰਨ ਗਲੋਕ ਪਿਸਤੌਲ, ਚਾਰ ਮੈਗਜੀਨ ਅਤੇ ਚਾਰ ਰੌਂਦ ਬਰਾਮਦ ਹੋਏ। ਗ੍ਰਿਫਤਾਰ ਮੁਲਜ਼ਮਾ ਦੀ ਪਛਾਣ ਗੁਰਸੇਵਕ ਸਿੰਘ ਉਰਫ ਸੂਰਜ ਵਾਸੀ ਨਵੀਂ ਅਬਾਦੀ, ਅਟਾਰੀ ਅਤੇ ਅਮਰਜੀਤ ਸਿੰਘ ਉਰਫ ਰੋਹਿਤ ਵਾਸੀ ਸ਼ੁਬਾਸ਼ ਰੋਡ, ਛੇਹਰਟਾ ਵਜੋਂ ਹੋਈ ਹੈ।

ਇਸ ਸਬੰਧ ਵਿੱਚ ਅਸਲਾ ਐਕਟ 25(1) ਏ, 25(6), 25(7), 25(8) ਅਤੇ ਯੂਏਪੀਏ ਐਕਟ ਦੀ ਧਾਰਾ 13,16,18 ਅਧੀਨ ਥਾਣਾ ਘਰਿੰਡਾ ਵਿੱਚ ਦਰਜ ਰਜਿਸਟਰ ਕੀਤਾ ਗਿਆ ਹੈ। ਐੱਸ.ਐੱਸ.ਪੀ ਨੇ ਦੱਸਿਆ ਕਿ ਗ੍ਰਿਫਤਾਰ ਕੀਤੇ ਗਏ ਮੁਲਜ਼ਮਾਂ ਕੋਲੋਂ ਮੁੱਢਲੀ ਪੁੱਛਗਿੱਛ ਦੌਰਾਨ ਪਤਾ ਲੱਗਿਆ ਹੈ ਕਿ ਵਿਦੇਸ਼ੀ ਹੈਂਡਲਰਾਂ ਵੱਲੋਂ ਇਹ ਅਸਲਾ ਪੁਲੀਸ ਫੋਰਸ ਦੇ ਅਧਿਕਾਰੀਆ ਨੂੰ ਟਾਰਗੇਟ ਕਰਨ ਲਈ ਪਾਕਿਸਤਾਨ ਰਸਤੇ ਭੇਜਿਆ ਗਿਆ ।

ਇਸ ਮਾਮਲੇ ਦੀ ਤਫਤੀਸ਼ ਕੀਤੀ ਜਾ ਰਹੀ ਹੈ। ਜਿਸ ਵਿੱਚ ਹੋਰ ਮੁਲਜ਼ਮਾ ਦੀ ਸ਼ਮੂਲੀਅਤ ਤੇ ਗ੍ਰਿਫਤਾਰੀ ਸੰਭਵ ਹੈ ਅਤੇ ਹੋਰ ਅਹਿਮ ਖੁਲਾਸੇ ਹੋਣ ਦੀ ਸੰਭਾਵਨਾ ਹੈ।