India vs Pakistan: Amritsar ਦੇ Abhishek Sharma ’ਤੇ ਨਜ਼ਰਾਂ ਟਿਕੀਆਂ
ਬਾਈਕਾਟ ਦੇ ਵਿਵਾਦ ਅਤੇ ਸਿਆਸੀ ਤਣਾਅ ਦਰਮਿਆਨ ਮੈਦਾਨ ’ਚ ਉਤਰਨਗੀਆਂ ਦੋਵੇਂ ਟੀਮਾਂ; ਅੰਮ੍ਰਿਤਸਰ ਦੇ ਹੋਟਲਾਂ ਅਤੇ ਰੇਸਤਰਾਂ ’ਚ ਸਕ੍ਰੀਨਿੰਗ ਦੀਆਂ ਖਾਸ ਤਿਆਰੀਆਂ
ਕ੍ਰਿਕਟ ਦੀ ਦੁਨੀਆ ਦੇ ਸਭ ਤੋਂ ਵੱਡੇ ਅਤੇ ਕੱਟੜ ਵਿਰੋਧੀਆਂ ਭਾਰਤ ਅਤੇ ਪਾਕਿਸਤਾਨ ਵਿਚਾਲੇ ਅੱਜ ਹੋਣ ਵਾਲੇ ਆਈਸੀਸੀ ਟੀ-20 ਕ੍ਰਿਕਟ ਵਿਸ਼ਵ ਕੱਪ ਦੇ ਗਰੁੱਪ ਮੈਚ ਨੂੰ ਲੈ ਕੇ ਉਤਸ਼ਾਹ ਆਪਣੇ ਸਿਖਰਾਂ ’ਤੇ ਪਹੁੰਚ ਗਿਆ ਹੈ। ਕਈ ਵਾਰੀ ਦੇਰੀ ਅਤੇ ਬਾਈਕਾਟ ਦੇ ਸਿਲਸਿਲੇ ਤੋਂ ਬਾਅਦ ਦੋਵੇਂ ਗੁਆਂਢੀ ਦੇਸ਼ ਆਖਰਕਾਰ ਹਾਈ ਵੋਲਟੇਜ ਮੁਕਾਬਲੇ ਵਿੱਚ ਆਹਮੋ-ਸਾਹਮਣੇ ਹੋਣ ਲਈ ਤਿਆਰ ਹਨ। ਅੰਮ੍ਰਿਤਸਰ ਸ਼ਹਿਰ ਦੇ ਕਈ ਹੋਟਲਾਂ, ਬਾਰਾਂ ਅਤੇ ਰੈਸਟੋਰੈਂਟਾਂ ਨੇ ਪਹਿਲਾਂ ਹੀ ਇਸ ਮੈਚ ਦੀ ਲਾਈਵ ਸਕ੍ਰੀਨਿੰਗ ਲਈ ਖਾਸ ਪਾਰਟੀਆਂ' ਅਤੇ ਖਾਣ-ਪੀਣ ਦੇ ਵਿਸ਼ੇਸ਼ ਪੈਕੇਜਾਂ ਦਾ ਐਲਾਨ ਕਰ ਦਿੱਤਾ ਹੈ।
ਇਸ ਵਾਰ ਅੰਮ੍ਰਿਤਸਰ ਦੇ ਪ੍ਰਸ਼ੰਸਕਾਂ ਲਈ ਇਹ ਮੈਚ ਹੋਰ ਵੀ ਖਾਸ ਹੈ ਕਿਉਂਕਿ ਸ਼ਹਿਰ ਦਾ ਆਪਣਾ ਹੋਣਹਾਰ ਬੱਲੇਬਾਜ਼ ਅਭਿਸ਼ੇਕ ਸ਼ਰਮਾ ਪਾਕਿਸਤਾਨ ਵਿਰੁੱਧ ਮੈਦਾਨ ਵਿੱਚ ਉਤਰਨ ਲਈ ਪੂਰੀ ਤਰ੍ਹਾਂ ਤਿਆਰ ਹੈ। ਦੱਸਣਯੋਗ ਹੈ ਕਿ ਪੇਟ ਦੀ ਇਨਫੈਕਸ਼ਨ ਕਾਰਨ ਅਭਿਸ਼ੇਕ ਨਾਮੀਬੀਆ ਵਿਰੁੱਧ ਪਿਛਲਾ ਮੈਚ ਨਹੀਂ ਖੇਡ ਸਕਿਆ ਸੀ ਅਤੇ ਉਸ ਨੂੰ ਹਸਪਤਾਲ ਵਿੱਚ ਵੀ ਦਾਖਲ ਹੋਣਾ ਪਿਆ ਸੀ ਪਰ ਹੁਣ ਉਹ ਸਿਹਤਮੰਦ ਹਨ ਅਤੇ ਆਪਣੇ ਸ਼ਹਿਰ ਵਾਸੀਆਂ ਦੀਆਂ ਦੁਆਵਾਂ ਨਾਲ ਪਾਕਿਸਤਾਨੀ ਗੇਂਦਬਾਜ਼ਾਂ ਦਾ ਸਾਹਮਣਾ ਕਰਨਗੇ। ਸਥਾਨਕ ਕ੍ਰਿਕਟ ਪ੍ਰੇਮੀਆਂ ਦਾ ਕਹਿਣਾ ਹੈ ਕਿ ਪਿਛਲੇ ਸਾਲ ਏਸ਼ੀਆ ਕੱਪ ਵਿੱਚ ਪਾਕਿਸਤਾਨ ਵਿਰੁੱਧ ਅਭਿਸ਼ੇਕ ਦੀ ਸ਼ਾਨਦਾਰ ਪਾਰੀ ਤੋਂ ਬਾਅਦ, ਉਸ ਨੂੰ ਮੁੜ ਐਕਸ਼ਨ ਵਿੱਚ ਦੇਖਣਾ ਵਧੀਆ ਲੱਗੇਗਾ।
ਦੋਵਾਂ ਦੇਸ਼ਾਂ ਵਿਚਾਲੇ ਚੱਲ ਰਹੇ ਸਿਆਸੀ ਤਣਾਅ ਅਤੇ ਮੈਚ ਤੋਂ ਪਹਿਲਾਂ ਹੋਏ ਬਾਈਕਾਟ ਨੇ ਪ੍ਰਸ਼ੰਸਕਾਂ ਨੂੰ ਆਖਰੀ ਮਿੰਟ ਤੱਕ ਸ਼ਸ਼ੋਪੰਜ ਵਿੱਚ ਰੱਖਿਆ ਸੀ, ਪਰ ਹੁਣ ਖੇਡ ਪ੍ਰੇਮੀ ਸਿਰਫ਼ ਮੈਦਾਨੀ ਜੰਗ ਦਾ ਆਨੰਦ ਲੈਣ ਲਈ ਤਿਆਰ ਹਨ। ਅੰਮ੍ਰਿਤਸਰ ਦੇ ਟੈਕਸਟਾਈਲ ਕਾਰੋਬਾਰੀ ਕੁਨਾਲ ਸਹਿਗਲ ਵਰਗੇ ਕਈ ਪ੍ਰਸ਼ੰਸਕਾਂ ਨੇ ਆਪਣੇ ਘਰਾਂ ਵਿੱਚ ਵੀ ਦੋਸਤਾਂ ਨਾਲ ਮੈਚ ਦੇਖਣ ਲਈ ਵੱਡੀਆਂ ਤਿਆਰੀਆਂ ਕੀਤੀਆਂ ਹੋਈਆਂ ਹਨ।
