ਲੰਡਨ, 16 ਅਗਸਤ
ਭਾਰਤ ਨੇ ਮੇਜ਼ਬਾਨ ਇੰਗਲੈਂਡ ਨੂੰ ਲਾਰਡਜ਼ ਵਿੱਚ ਖੇਡੇ ਜਾ ਰਹੇ ਦੂਜੇ ਟੈਸਟ ਕ੍ਰਿਕਟ ਮੈਚ ਵਿੱਚ ਪੰਜਵੇਂ ਦਿਨ 151 ਦੌੜਾਂ ਨਾਲ ਹਰਾ ਕੇ ਪੰਜ ਮੈਚਾਂ ਦੀ ਲੜੀ ਵਿਚ 1-0 ਦੀ ਲੀਡ ਲੈ ਲਈ ਹੈ। ਇੰਗਲੈਂਡ ਸਾਹਮਣੇ ਜਿੱਤ ਲਈ 192 ਦੌੜਾਂ ਦਾ ਟੀਚਾ ਸੀ ਪਰ ਉਸ ਦੀ ਟੀਮ ਮਹਿਜ਼ 120 ਦੌੜਾਂ ’ਤੇ ਹੀ ਢਹਿ ਗਈ। ਭਾਰਤ ਵੱਲੋਂ ਮੁਹੰਮਦ ਸਿਰਾਜ ਨੇ ਚਾਰ, ਜਸਪ੍ਰੀਤ ਬੁਮਰਾਹ ਨੇ ਤਿੰਨ ਅਤੇ ਇਸਾਂਤ ਸ਼ਰਮਾ ਨੇ ਦੋ ਅਤੇ ਮੁਹੰਮਦ ਸ਼ਮੀ ਨੇ ਇਕ ਵਿਕਟ ਲਿਆ। ਭਾਰਤੀ ਤੇਜ਼ ਗੇਂਦਬਾਜ਼ਾਂ ਨੇ ਪਹਿਲਾਂ ਬੱਲੇ ਨਾਲ ਕਮਾਲ ਦਿਖਾਇਆ ਮਗਰੋਂ ਤਿੱਖੀ ਗੇਂਦਬਾਜ਼ੀ ਕਰਕੇ ਇੰਗਲੈਂਡ ਦੇ ਬੱਲੇਬਾਜ਼ਾਂ ਨੂੰ 120 ’ਤੇ ਹੀ ਸਮੇਟ ਦਿੱਤਾ । ਭਾਰਤ ਨੇ ਮੈਚ ਦੇ ਪੰਜਵੇਂ ਅਤੇ ਅੰਤਿਮ ਦਿਨ ਇੰਗਲੈਂਡ ਸਾਹਮਣੇ 60 ਓਵਰਾਂ ਵਿੱਚ 272 ਦੌੜਾਂ ਦਾ ਟੀਚਾ ਰੱਖਿਆ ਸੀ। ਸ਼ਮੀ ਅਤੇ ਬੁਮਰਾਹ ਨੇ ਨੌਂਵੀਂ ਵਿਕਟ ਲਈ 89 ਦੌੜਾਂ ਦੀ ਭਾਈਵਾਲੀ ਕੀਤੀ ਤੇ ਦੂਜੀ ਪਾਰੀ ਅੱਠ ਵਿਕਟਾਂ ’ਤੇ 298 ਦੌੜਾਂ ’ਤੇ ਖਤਮ ਕਰਨ ਦਾ ਐਲਾਨ ਕੀਤਾ ਸੀ। ਭਾਰਤ ਨੇ ਕੇਐਲ ਰਾਹੁਲ ਦੀਆਂ 129 ਦੌੜਾਂ ਦੀ ਮਦਦ ਨਾਲ ਪਹਿਲੀ ਪਾਰੀ ਵਿੱਚ 364 ਦੌੜਾਂ ਬਣਾਈਆਂ ਸਨ ਜਿਸ ਦੇ ਜਵਾਬ ਵਿੱਚ ਇੰਗਲੈਂਡ ਨੇ ਜੋ ਰੂਟ ਦੀ ਨਾਬਾਦ 180 ਦੌੜਾਂ ਦੀ ਪਾਰੀਦੀ ਬਦੌਲਤ 391 ਦੌੜਾਂ ਬਣਾ ਕੇ 27 ਦੌੜਾਂ ਦੀ ਲੀਡ ਲੈ ਲਈ ਸੀ। ਭਾਰਤ ਦੀ ਲਾਰਡਜ਼ ਵਿੱਚ 19 ਮੈਚਾਂ ਵਿੱਚ ਇਹ ਤੀਜੀ ਜਿੱਤ ਹੈ। ਇਸ ਤੋਂ ਪਹਿਲਾਂ ਭਾਰਤ ਨੇ 1986 ਅਤੇ 2014 ਵਿੱਚ ਇਸ ਇਤਿਹਾਸਕ ਮੈਦਾਨ ’ਤੇ ਜਿੱਤ ਦਰਜ ਕੀਤੀ ਸੀ। -ਏਜੰਸੀ