ਰਮੇਸ਼ ਭਾਰਦਵਾਜ
ਲਹਿਰਾਗਾਗਾ, 7 ਜੁਲਾਈ
ਜੁਲਾਈ ਮਹੀਨਾ ਦੇ ਪਹਿਲੇ ਹਫ਼ਤੇ ਵਿੱਚ ਟਮਾਟਰ ਦਾ ਭਾਅ 80 ਰੁਪਏ ਪ੍ਰਤੀ ਕਿੱਲੋ ਤੱਕ ਜਾ ਪਹੁੰਚਿਆ ਹੈ। ਜੁਲਾਈ ਮਹੀਨੇ ’ਚ ਸਬਜ਼ੀਆਂ ਦੇ ਰੇਟ ਵੀ ਦੋਗੁਣੇ ਹੋਣ ਕਰਕੇ ਆਮ ਛੋਟੇ ਸਬਜ਼ੀ ਵਿਕਰੇਤਾ ਕੰਮ ਬਦਲ ਕੇ ਹੋਰ ਸਾਮਾਨ ਵੇਚਣ ਲੱਗੇ ਹਨ।
ਸਬਜ਼ੀ ਮੰਡੀ ਦੇ ਸਰਵੇਖਣ ਅਨੁਸਾਰ ਇਸ ਵੇਲੇ ਹਰੇ ਮਟਰ 100 ਰੁਪਏ ਕਿਲੋ, ਆਲੂ 25-30 ਰੁਪਏ, ਕੱਦੂ 20, ਤੋਰੀ ਭਿੰਡੀ 40 ਰੁਪਏ, ਬੈਂਗਣ 20-30, ਪਾਲਕ 30-40 ਰੁਪਏ, ਚਲਾਈ ਸਾਗ 20-30 ਪ੍ਰਤੀ ਕਿੱਲੋ, ਗੌਭੀ 50-60 ਰੁਪਏ ਅਤੇ ਪਿਆਜ ਵੀ 20 ਰੁਪਏ ਕਿਲੋ ਤੱਕ ਮੁੜ ਪਹੁੰਚ ਗਏ ਹਨ ਜੋ ਜੂਨ ’ਚ 10 ਰੁਪਏ ’ਤੇ ਪਹੁੰਚੇ ਸਨ। ਇਸ ਵਾਰ ਗਰਮੀ ਕਰਕੇ ਨੀਬੂ 60-80 ਰੁਪਏ ਕਿਲੋਂ ਰੀਟੇਲ ’ਚ ਵਿੱਕ ਰਿਹਾ ਹੈ।
ਸਬਜ਼ੀ ਵਿਕਰੇਤਾਵਾਂ ਨਰੇਸ਼ ਕੁਮਾਰ ਨੀਸ਼ੂ, ਇੰਦੂ ਅਰੋੜਾ ਤੇ ਰਾਮ ਨਿਵਾਸੀ ਦਾ ਕਹਿਣਾ ਹੈ ਕਿ ਕਿਸਾਨਾਂ ਵੱਲੋਂ ਸਬਜ਼ੀ ਵਾਲੇ ਖੇਤਾਂ ਨੂੰ ਵਾਹ ਕੇ ਝੋਨਾ ਬੀਜਣ ਅਤੇ ਬੀਤੇ ਦਿਨੀਂ ਆਏ ਝੱਖੜ ਅਤੇ ਗਰਮੀ ਕਰਕੇ ਸਬਜ਼ੀਆਂ ਖਰਾਬ ਹੋਣ ਕਰਕੇ ਰੇਟ ਮਹਿੰਗੇ ਹੋਏ ਹਨ।
ਉਨ੍ਹਾਂ ਦੱਸਿਆ ਕਿ ਇੱਥੇ ਜ਼ਿਆਦਾਤਰ ਸਬਜ਼ੀ ਸੁਨਾਮ ਪਾਤੜਾਂ ਦੀ ਮੰਡੀ ’ਚੋਂ ਆਉਂਦੀ ਹੈ ਜਿਸ ਕਰਕੇ ਵਿਕਰੇਤਾਵਾਂ ਨੂੰ ਦੋਹਰੀ ਮਾਰਕੀਟ ਫੀਸ ਭਰਨੀ ਪੈਂਦੀ ਹੈ, ਇਸ ਕਰਕੇ ਸਬਜ਼ੀਆਂ ਦੇ ਭਾਅ ਵਧੇ ਹਨ।