ਪੁਣੇ, 28 ਅਕਤੂਬਰ
ਪੁਣੇ ਪੁਲੀਸ ਦੇ ਫਿਰੌਤੀ ਵਿਰੋਧੀ ਦਸਤੇ (ਏਈਸੀ) ਨੇ ਕਰੂਜ਼ ਪਾਰਟੀ ਦੌਰਾਨ ਨਾਰਕੋਟਿਕਸ ਕੰਟਰੋਲ ਬਿਊਰੋ (ਐੱਨਸੀਬੀ) ਵੱਲੋਂ ਮਾਰੇ ਛਾਪੇ ਦੇ ਮੁੱਖ ਗਵਾਹ ਕਿਰਨ ਪੀ. ਗੋਸਾਵੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਮਹਾਰਾਸ਼ਟਰ ਪੁਲੀਸ ਨੂੰ ਉਹ ਧੋਖਾਧੜੀ ਦੇ ਕਈ ਮਾਮਲਿਆਂ ਵਿੱਚ ਲੋੜੀਂਦਾ ਸੀ। ਪੁਣੇ ਦੇ ਪੁਲੀਸ ਕਮਿਸ਼ਨਰ ਅਮਿਤਾਭ ਗੁਪਤਾ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਗੋਸਾਵੀ, ਜੋ ਕਰੀਬ ਪੰਦਰਵਾੜੇ ਤੱਕ ਲੁਕਿਆ ਹੋਇਆ ਸੀ, ਨੂੰ ਕਟਰਾਜ ਦੇ ਲੌਜ ਤੋਂ ਕਾਬੂ ਕੀਤਾ ਗਿਆ। ਉਸ ਨੂੰ ਪੁਲੀਸ ਹੈੱਡਕੁਆਰਟਰ ਲਿਆਂਦਾ ਗਿਆ ਅਤੇ ਬਾਅਦ ਵਿੱਚ ਗ੍ਰਿਫਤਾਰ ਕਰ ਲਿਆ ਗਿਆ। ਸ੍ਰੀ ਗੁਪਤਾ ਨੇ ਕਿਹਾ,‘ਮੈਨੂੰ ਇਹ ਸਪੱਸ਼ਟ ਕਰਨ ਦਿਓ। ਅਸੀਂ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਹੈ, ਉਸ ਨੇ ਆਤਮ ਸਮਰਪਣ ਨਹੀਂ ਕੀਤਾ ਹੈ।’ ਗੋਸਾਵੀ ਉਹ ਵਿਅਕਤੀ ਹੈ, ਜਿਸਦੀ ਬਾਲੀਵੁੱਡ ਅਦਾਕਾਰ ਸ਼ਾਹਰੁਖ ਖਾਨ ਦੇ ਪੁੱਤ ਆਰੀਅਨ ਖ਼ਾਨ ਨਾਲ ਸੈਲਫੀ, ਵਾਇਰਲ ਹੋਈ ਸੀ।