ਹੈਦਰਾਬਾਦ/ਕੋਲਕਾਤਾ, 4 ਮਈ
ਦੇਸ਼ ਵਿੱਚ ਕਰੋਨਾ ਜਾਨਵਰਾਂ ਵਿੱਚ ਫੈਲਣ ਲੱਗਿਆ ਹੈ। ਪਹਿਲੀ ਵਾਰ ਇਕੱਠੇ 8 ਸ਼ੇਰਾਂ ਦੀ ਕਰੋਨਾ ਰਿਪੋਰਟ ਪਾਜ਼ੇਟਿਵ ਆਉਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਕੋਵਿਡ-19 ਦੀ ਲਾਗ ਤੋਂ ਪੀੜਤ ਇਹ ਸਾਰੇ ਏਸ਼ਿਆਈ ਸ਼ੇਰ ਹੈਦਰਾਬਾਦ ਦੇ ਨਹਿਰੂ ਜ਼ੂਲੌਜੀਕਲ ਪਾਰਕ ਦੇ ਹਨ। ਚਿੜੀਆ ਘਰ ਵਿੱਚ ਕੰਮ ਕਰਨ ਵਾਲੇ ਮੁਲਾਜ਼ਮਾਂ ਨੇ 24 ਅਪਰੈਲ ਨੂੰ ਸ਼ੇਰਾਂ ਵਿੱਚ ਕਰੋਨਾ ਦੇ ਲੱਛਣ ਨੋਟਿਸ ਕੀਤੇ ਸਨ। ਉਧਰ ਪੱਛਮੀ ਬੰਗਾਲ ਵਿੱਚ ਕਰੋਨਾਵਾਇਰਸ ਦੇ ਫੈਲਾਅ ਨੂੰ ਰੋਕਣ ਲਈ ਮਿਊਜ਼ੀਅਮ, ਪਲੈਨੇਟੋਰੀਅਮ, ਚਿੜੀਆਘਰ ਤੇ ਕੌਮੀ ਪਾਰਕ ਬੰਦ ਕਰ ਦਿੱਤੇ ਗਏ ਹਨ। ਪੱਛਮੀ ਬੰਗਾਲ ਦੇ ਮੁੱਖ ਵਾਈਲਡਲਾਈਫ ਵਾਰਡਨ ਵੀ.ਕੇ.ਯਾਦਵ ਨੇ ਵਧੀਕ ਮੁੱਖ ਸਕੱਤਰ (ਜੰਗਲਾਤ) ਵੱਲੋਂ ਜਾਰੀ ਨੋਟੀਫਿਕੇਸ਼ਨ ਦੇ ਹਵਾਲੇ ਨਾਲ ਕਿਹਾ ਕਿ ਈਕੋ-ਟੂਰਿਜ਼ਮ ਪ੍ਰਾਜੈਕਟਾਂ, ਕੌਮੀ ਪਾਰਕਾਂ ਤੇ ਟਾਈਗਰ ਜੰਗਲੀ ਜੀਵ ਰੱਖਾਂ ਵਿੱਚ 1 ਮਈ ਤੋਂ ਲੋਕਾਂ ਦੀ ਫੇਰੀ ’ਤੇ ਮੁਕੰਮਲ ਪਾਬੰਦੀ ਹੈ।