ਗੁਰਦੀਪ ਸਿੰਘ ਲਾਲੀ
ਸੰਗਰੂਰ, 18 ਮਈ
ਬੀਤੀ ਰਾਤ ਆਏ ਤੇਜ਼ ਹਨੇਰੀ, ਮੀਂਹ ਅਤੇ ਝੱਖੜ ਕਾਰਨ ਆਮ ਜਨਜੀਵਨ ਪ੍ਰਭਾਵਿਤ ਹੋਇਆ ਹੈ। ਮੀਂਹ ਤੇ ਝੱਖੜ ਨੇ ਜਿਥੇ ਵੱਡੇ ਵੱਡੇ ਦਰੱਖਤ ਉਖਾੜ ਸੁੱਟੇ ਉਥੇ ਬਿਜਲੀ ਦੇ ਟਰਾਂਸਫਾਰਮਰ ਅਤੇ ਖੰਭਿਆਂ ਨੂੰ ਪੁੱਟ ਸੁੱਟਿਆ। ਘਾਬਦਾਂ ਨੇੜੇ ਪੈਟਰੌਲ ਪੰਪ ਤਹਿਸ-ਨਹਿਸ ਕਰਕੇ ਰੱਖ ਦਿੱਤਾ ਅਤੇ ਸ਼ਹਿਰ ‘ਚ ਕਈ ਕੰਧਾਂ ਢਹਿ ਗਈਆਂ। ਡੀ.ਸੀ. ਦਫ਼ਤਰ ਅੱਗੇ ਚੱਲ ਰਹੇ ਪੱਕੇ ਮੋਰਚੇ ਦਾ ਟੈਂਟ ਉਖਾੜ ਸੁੱਟਿਆ। ਸੜਕਾਂ ‘ਤੇ ਦਰੱਖਤ ਡਿੱਗਣ ਕਾਰਨ ਆਵਾਜਾਈ ਪ੍ਰਭਾਵਿਤ ਹੋਈ ਹੈ ਜਦੋਂ ਕਿ ਬਿਜਲੀ ਸਪਲਾਈ ਕਰੀਬ 15 ਘੰਟੇ ਤੋਂ ਵੱਧ ਸਮਾਂ ਗੁੱਲ ਰਹੀ। ਪਾਵਰਕੌਮ ਅਨੁਸਾਰ ਬਿਜਲੀ ਦੇ 178 ਟਰਾਂਸਫਾਰਮਰ ਅਤੇ 551 ਬਿਜਲੀ ਦੇ ਪੋਲ ਟੁੱਟ ਗਏ ਹਨ ਜਿਸ ਕਾਰਨ ਸੰਗਰੂਰ ਸਰਕਲ ‘ਚ ਕਰੀਬ ਡੇਢ ਕਰੋੜ ਰੁਪਏ ਦਾ ਨੁਕਸਾਨ ਹੋਣ ਦਾ ਅਨੁਮਾਨ ਹੈ। ਬੀਤੀ ਰਾਤ ਕਰੀਬ ਬਾਰਾਂ ਵਜ਼ੇ ਅਚਾਨਕ ਤੇਜ਼ ਹਨ੍ਹੇਰੀ ਨਾਲ ਮੀਂਹ ਝੱਖੜ ਇੱਕ ਡਰਾਵਨੇ ਤੂਫਾਨ ਦੀ ਤਰਾਂ ਆਇਆ ਜਿਸ ਨਾਲ ਆਮ ਜਨਜੀਵਨ ਬੁਰੀ ਤਰਾਂ ਪ੍ਰਭਾਵਿਤ ਹੋਇਆ ਹੈ। ਪੈਟਰੋਲ ਪੰਪ ਦੇ ਮੈਨੇਜਰ ਅਨੁਸਾਰ ਕਰੀਬ 35 ਲੱਖ ਰੁਪਏ ਦੇ ਨੁਕਸਾਨ ਦਾ ਅਨੁਮਾਨ ਹੈ। ਸੜਕਾਂ ਕਿਨਾਰੇ ਲੱਗੇ ਇਸ਼ਤਿਹਾਰੀ ਬੋਰਡ ਉਖੜ ਗਏ। ਪਾਵਰਕੌਮ ਸਰਕਲ ਸੰਗਰੂਰ ਦੇ ਨਿਗਰਾਨ ਇੰਜਨੀਅਰ ਰਤਨ ਮਿੱਤਲ ਅਨੁਸਾਰ ਤੇਜ਼ ਝੱਖੜ ਤੂਫ਼ਾਨ ਕਾਰਨ 178 ਟਰਾਂਸਫਾਰਮਰਾਂ ਦਾ ਨੁਕਸਾਨ ਹੋਇਆ ਹੈ ਜਦੋਂ ਕਿ 551 ਬਿਜਲੀ ਦੇ ਪੋਲ ਟੁੱਟ ਗਏ ਹਨ ਜਿਸ ਕਾਰਨ ਪਾਵਰਕੌਮ ਦਾ ਕਰੀਬ ਡੇਢ ਕਰੋੜ ਰੁਪਏ ਦੇ ਨੁਕਸਾਨ ਦਾ ਅਨੁਮਾਨ ਹੈ।
ਅਮਰਗੜ੍ਹ (ਰਾਜਿੰਦਰ ਜੈਦਕਾ): ਇਥੇ ਰਾਤ ਨੂੰ ਆਈ ਹਨੇਰੀ ਨੇ ਜਿਥੇ ਅਨੇਕਾਂ ਦਰੱਖਤ ਤੇ ਖੰਬੇ ਪੁੱਟ ਦਿੱਤੇ ਉੱਥੇ ਹੀ ਚੌ ਖੰਬੇ ਦੀਆਂ ਤਾਰਾਂ ਟੁੱਟਣ ਨਾਲ ਜਾਮ ਲੱਗ ਗਿਆ। ਤਾਰਾਂ ਨੂੰ ਬੰਨ ਕੇ ਰੱਸਿਆਂ ਦੀ ਸਹਾਇਤਾ ਨਾਲ ਟਰੱਕ ਤੇ ਹੋਰ ਵਾਹਣ ਲੰਘਾਏ ਗਏ। ਮਿਲੀ ਜਾਣਕਾਰੀ ਅਨੁਸਾਰ ਤੇਜ ਹਨੇਰੀ ਤੇ ਝੱਖੜ ਨੇ ਦਰਖ਼ਤ ਤਾਰਾਂ ਤੇ ਡਿੱਗਣ ਨਾਲ ਰਸਤਾ ਬੰਦ ਹੋ ਗਿਆ। ਸਵੇਰ ਤੋਂ ਹੀ ਜਾਮ ਲੱਗਣਾ ਸ਼ੁਰੂ ਹੋ ਗਿਆ। ਇਸ ਤੋਂ ਇਲਾਵਾ ਬਾਗੜੀਆਂ, ਢਢੋਗਲ, ਨਾਰੀਕੇ ਸੜਕ ‘ਤੇ ਅਨੇਕਾਂ ਦਰਖਤ ਟੁੱਟ ਕੇ ਰਸਤਾ ਜਾਮ ਹੋ ਗਿਆ। ਮਹਿਕਮੇ ਦੇ ਕਰਮਚਾਰੀ ਅੱਜ ਸਵੇਰ ਤੋਂਹੀ ਕੰਮ ਤੇ ਲੱਗੇ ਹੋਏ ਹਨ। ਅਮਰਗੜ੍ਹ ਸ਼ਹਿਰ ਦੀ ਲਾਈਟ ਬਹਾਲ ਕਰ ਦਿੱਤੀ ਗਈ ਹੈ।
ਚੀਮਾ ਮੰਡੀ (ਜਸਵੰਤ ਸਿੰਘ ਗਰੇਵਾਲ): ਬੀਤੀ ਰਾਤ ਇਸ ਇਲਾਕੇ ਵਿੱਚ ਆਏ ਤੇਜ ਝੱਖੜ ਕਾਰਨ ਜਨ ਜੀਵਨ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਇਆ। ਇਸ ਤੇ ਝੱਖੜ ਕਾਰਨ ਇਲਾਕੇ ਵਿੱਚ ਭਾਰੀ ਗਿਣਤੀ ਵਿੱਚ ਦਰਖਤ ਟੁੱਟ ਗਏ ਤੇ ਇਹ ਦਰੱਖਤ ਸੜਕਾਂ ਤੇ ਡਿੱਗਣ ਕਾਰਨ ਆਵਾਜਾਈ ਵਿੱਚ ਭਾਰੀ ਵਿਘਨ ਪਿਆ। ਇਸ ਤੋਂ ਇਲਾਵਾ ਲੋਕਾਂ ਦੇ ਘਰਾਂ ਦੀਆਂ ਦੀਵਾਰਾਂ ਤੇ ਸੈੱਡ ਬਗੈਰਾ ਵੀ ਡਿੱਗ ਗਏ। ਇਸ ਝੱਖੜ ਕਾਰਨ ਬਿਜਲੀ ਦੇ ਖੰਭੇ ਡਿਗਣ ਤੇ ਤਾਰਾਂ ਟੁੱਟਣ ਕਾਰਨ ਇਲਾਕੇ ਦੇ ਪਿੰਡਾਂ ਵਿੱਚ ਬਿਜਲੀ ਸਪਲਾਈ ਬੰਦ ਹੋ ਗਈ ਤੇ ਲੋਕਾਂ ਨੂੰ ਗਰਮੀ ਦਾ ਮੌਸਮ ਹੋਣ ਕਾਰਨ ਭਾਰੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ।ਇਸ ਤੋਂ ਇਲਾਵਾ ਪਾਣੀ ਵਾਲੀਆਂ ਮੋਟਰਾਂ ਬਿਜਲੀ ਤੇ ਹੀ ਨਿਰਭਰ ਹੋਣ ਕਾਰਨ ਲੋਕਾਂ ਨੂੰ ਪਾਣੀ ਦੀ ਘਾਟ ਦਾ ਸਾਹਮਣਾ ਕਰਨਾ ਪਿਆ। ਬਿਜਲੀ ਦੀ ਸਪਲਾਈ ਚਾਲੂ ਕਰਨ ਲਈ ਬਿਜਲੀ ਕਰਮਚਾਰੀਆਂ ਨੂੰ ਸਾਰਾ ਦਿਨ ਭਾਰੀ ਮੁਸ਼ੱਕਤ ਕਰਨੀ ਪਈ ਅਤੇ ਸ਼ਹਿਰੀ ਖੇਤਰਾਂ ਵਿੱਚ ਪਹਿਲਾਂ ਬਿਜਲੀ ਸਪਲਾਈ ਚਾਲੂ ਕਰਨ ਦੇ ਉਪਰਾਲੇ ਕੀਤੇ ਗਏ।
ਲਹਿਰਾਗਾਗਾ (ਰਮੇਸ਼ ਭਾਰਦਵਾਜ): ਲੰਘੀ ਰਾਤ ਆਏ ਤੂਫ਼ਾਨ ਨੇ ਜਿਥੇ ਵੱਡੀ ਪੱਧਰ ‘ਤੇ ਦਰੱਖਤਾਂ ਉਖਾੜ ਕੇ ਡੇਗ ਦਿੱਤਾ, ਦਰਖ਼ਤਾਂ ਉੱਪਰ ਰੈਣ ਬਸੇਰਾ ਕਰ ਰਹੇ ਜਾਨਵਰਾਂ ਦਾ ਜਾਨੀ ਨੁਕਸਾਨ ਕੀਤਾ ਉਥੇ ਸੜਕਾਂ ਉੱਪਰ ਡਿੱਗੇ ਦਰਖ਼ਤਾਂ ਨੇ ਆਵਾਜਾਈ ਵਿਚ ਵਿਘਣ ਪਿਆ। ਮਾਲੇਰਕੋਟਲਾ (ਹੁਸ਼ਿਆਰ ਸਿੰਘ ਰਾਣੂੰ): ਰਾਤ ਕਰੀਬ ਬਾਰਾਂ ਵਜੇ ਆਏ ਤੇਜ਼ ਝੱਖੜ ਕਾਰਨ ਮਾਲੇਰਕੋਟਲਾ ਸ਼ਹਿਰ ਅਤੇ ਨੇੜਲੇ ਪਿੰਡਾਂ ‘ਚ ਜਨ ਜੀਵਨ ਪ੍ਰਭਾਵਿਤ ਹੋਇਆ।ਤ ੇਜ਼ ਹਵਾ ਕਾਰਨ ਇਸ ਖੇਤਰ ‘ਚ ਬਿਜਲੀ ਸਪਲਾਈ ਠੱਪ ਹੋ ਗਈ, ਕਈ ਥਾਂ ਦਰਖ਼ਤ ਡਿੱਗ ਪਏ ਅਤੇ ਸੜਕ ‘ਤੇ ਡਿੱਗੇ ਦਰਖ਼ਤਾਂ ਕਾਰਨ ਸਵੇਰ ਵਕਤ ਰਾਹਗੀਰਾਂ ਤੇ ਸੜਕ ‘ਤੇ ਚੱਲਣ ਵਾਲੇ ਵਾਹਨਾਂ ਨੂੰ ਦਿੱਕਤ ਪੇਸ਼ ਆਈ।
ਰਾਤ 12 ਵਜੇ ਤੋਂ ਬਾਅਦ ਮੁਕੰਮਲ ਬੰਦ ਹੋਈ ਬਿਜਲੀ ਸਪਲਾਈ
ਸੰਦੌੜ (ਮੁਕੰਦ ਸਿੰਘ ਚੀਮਾ): ਰਾਤ ਝੱਖੜ ਤੋਂ ਬਾਅਦ ਸਵੇਰ ਵੇਲੇ ਹਰ ਪਾਸੇ ਦਰੱਖਤ ਅਤੇ ਖੰਭੇ ਟੁੱਟੇ ਪਏ ਦਿਖਾਈ ਦੇ ਰਹੇ ਸਨ। ਰਾਏਕੋਟ ਮਾਲੇਰਕੋਟਲਾ ਮੁੱਖ ਮਾਰਗ ਤੋਂ ਇਲਾਵਾ ਪਿੰਡਾਂ ਨੂੰ ਜਾਂਦੀਆਂ ਲਿੰਕ ਸੜਕਾਂ ਉਪਰ ਦਰੱਖਤ ਡਿੱਗ ਜਾਣ ਕਾਰਣ ਆਵਜਾਈ ਵੀ ਕਾਫੀ ਚਿਰ ਤੱਕ ਠੱਪ ਰਹੀ। ਪੂਰੇ ਇਲਾਕੇ ਵਿਚ ਰਾਤ 12 ਵਜੇ ਤੋਂ ਬਾਅਦ ਬਿਜਲੀ ਸਪਲਾਈ ਪੂਰਨ ਤੌਰ ਤੇ ਬੰਦ ਪਈ ਹੈ। ਸਥਾਨਕ ਪਾਵਰਕਾਮ ਦੇ ਅਧਿਕਾਰੀਆਂ ਅਨੁਸਾਰ ਇਲਾਕੇ ਵਿਚ ਬਿਜਲੀ ਸਪਲਾਈ ਵਾਲੀਆਂ ਲਾਈਨਾਂ ਟੁੱਟ ਗਈਆਂ ਹਨ। ਉਧਰ, ਅੱਧੀ ਰਾਤ ਪਿੰਡ ਫਰਵਾਲੀ ਵਿਖੇ ਇਕ ਧਾਰਮਿਕ ਸਥਾਨ ਤੇ ਅਚਾਨਕ ਲੱਗੀ ਨੌਜਵਾਨਾਂ ਅਤੇ ਥਾਣਾ ਸੰਦੌੜ ਦੀ ਪੁਲੀਸ ਦੇ ਸਹਿਯੋਗ ਨਾਲ ਅੱਗ ‘ਤੇ ਕਾਬੂ ਪਾਇਆ ਗਿਆ। ਇਸਤੋਂ ਇਲਾਵਾ ਪਿੰਡਾਂ ਵਿਚ ਕਈ ਥਾਵਾਂ ਤੇ ਲੋਕਾਂ ਦੇ ਘਰਾਂ ਵਿਚ ਪਾਏ ਗਏ ਸੈਡ, ਚਾਦਰਾਂ ਝੱਖੜ ਵਿਚ ਉਡ ਗਈਆਂ ਅਤੇ ਕਈ ਥਾਵਾਂ ਤੇ ਕੰਧਾਂ ਵੀ ਡਿੱਗ ਪਈਆਂ।
ਰਾਈਸ ਮਿੱਲਾਂ ਦੇ ਸ਼ੈੱਡ ਉੱਡੇ, ਕੰਧਾਂ ਡਿੱਗੀਆਂ, ਕਰੋੜਾਂ ਦਾ ਨੁਕਸਾਨ
ਸ਼ੇਰਪੁਰ (ਪੱਤਰ ਪ੍ਰੇਰਕ): ਇਥੋਂ ਦੇ ਵਪਾਰੀ ਅਰਿਹੰਤ ਕੁਮਾਰ ਜਿੰਦਲ ਨੇ ਦੱਸਿਆ ਕਿ ਪੰਜਗਰਾਈਆਂ-ਮਨਾਲ ਰੋਡ ਟਿੱਬਾ ਵਿਚ ਅਰਿਹੰਤ ਰਾਈਸ ਮਿੱਲ ਟਿੱਬਾ ਵਿਚ ਉਸ ਦੇ ਸ਼ੈੱਡ ਦੀਆਂ ਕੰਧਾਂ ਡਿੱਗ ਪਈਆਂ ਜਿਸ ਨਾਲ ਉਸ ਦਾ ਤਕਰੀਬਨ ਪੰਜਾਹ ਲੱਖ ਦਾ ਨੁਕਸਾਨ ਹੋਇਆ ਹੈ। ਇਸੇ ਤਰ੍ਹਾਂ ਸਵਰਨ ਰਾਈਸ ਮਿੱਲ ਗੁਰਬਖ਼ਸ਼ਪੁਰਾ ਵਿਚ ਸ਼ੈੱਡ ਉੱਡਣ, ਕੰਧਾਂ ਡਿੱਗਣ ਕਾਰਨ ਮਾਲਕ ਦਾ ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ ਹੈ। ਇਸ ਤੋਂ ਇਲਾਵਾ ਰਾਘਵ ਰਾਈਸ ਮਿੱਲ ਪਿੰਡ ਦਸੌਂਦਾ ਸਿੰਘ ਵਾਲਾ ਵਿਚ ਵੀ ਨੁਕਸਾਨ ਦੀ ਖਬਰ ਹੈ।
ਤੇਜ਼ ਝੱਖੜ ਦੌਰਾਨ ਲੱਗੀ ਅੱਗ ਕਾਰਨ ਇਕ ਗਾਂ ਸੜ ਕੇ ਮਰੀ; ਅੱਠ ਟਰਾਲੀਆਂ ਤੂੜੀ ਸੜੀ
ਭਵਾਨੀਗੜ੍ਹ (ਮੇਜਰ ਸਿੰਘ ਮੱਟਰਾਂ): ਬੀਤੀ ਅੱਧੀ ਰਾਤ ਆਏ ਤੇਜ਼ ਰਫ਼ਤਾਰ ਝੱਖੜ ਦੌਰਾਨ ਲੱਗੀ ਅੱਗ ਕਾਰਣ ਨੇੜਲੇ ਪਿੰਡ ਬੀਂਬੜੀ ਦੇ ਮਜ਼ਦੂਰ ਪਰਿਵਾਰਾਂ ਦੇ ਤੂੜੀ ਦੇ ਕੁੱਪਾਂ ਅਤੇ ਪਸ਼ੂਆਂ ਦਾ ਭਾਰੀ ਨੁਕਸਾਨ ਹੋ ਗਿਆ ਹੈ।ਪਿੰਡ ਬੀਂਬੜੀ ਦੇ ਮਜ਼ਦੂਰ ਜਗਸੀਰ ਸਿੰਘ ਨੇ ਦੱਸਿਆ ਕਿ ਅੱਧੀ ਰਾਤ ਨੂੰ ਤੇਜ਼ ਹਨੇਰੀ ਕਾਰਨ ਉਸ ਦੇ ਦੋ ਕੁੱਪਾਂ ਨੂੰ ਅੱਗ ਲੱਗ ਗਈ। ਇਨ੍ਹਾਂ ਕੁੱਪਾਂ ਵਿੱਚ ਤੂੜੀ ਖ਼ਰੀਦ ਕੇ ਪਾਈ ਹੋਈ ਸੀ,ਜੋਂ ਸੜ ਕੇ ਸੁਆਹ ਹੋ ਗਈ।ਇਸੇ ਤਰ੍ਹਾਂ ਮਜ਼ਦੂਰ ਜੱਗਾ ਸਿੰਘ ਨੇ ਦੱਸਿਆ ਕਿ ਭਿਆਨਕ ਰੂਪ ਵਿੱਚ ਫੈਲੀ ਅੱਗ ਨੇ ਉਸ ਦੇ ਤੂੜੀ ਦੇ ਕੁੱਪ ਅਤੇ ਵਰਾਂਡੇ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ। ਵਰਾਂਡੇ ਵਿੱਚ ਪਈ ਤੂੜੀ ਨੂੰ ਅੱਗ ਲੱਗਣ ਨਾਲ ਵਰਾਂਡੇ ਵਿੱਚ ਹੀ ਬੰਨੇਂ ਹੋਏ 7 ਪਸ਼ੂਆਂ ਵਿੱਚੋਂ ਇੱਕ ਤਾਜ਼ਾ ਸੂਈ ਹੋਈ ਗਾਂ ਝੁਲਸ ਜਾਣ ਕਾਰਣ ਮੌਤ ਦੇ ਮੂੰਹ ਵਿੱਚ ਪੈ ਗਈ, ਜਦੋਂ ਕਿ ਇੱਕ ਮੱਝ ਤੇ ਇਕ ਗਾਂ ਬੁਰੀ ਤਰਾਂ ਝੁਲਸੇ ਗਏ। ਵਰਾਂਡੇ ਦੀ ਛੱਤ ਅਤੇ ਤੂੜੀ ਸੜ ਗਈ। ਉਨ੍ਹਾਂ ਦੱਸਿਆ ਕਿ ਪਹਿਲਾਂ ਲੋਕਾਂ ਨੇ ਅੱਗ ਬੁਝਾਉਣ ਦਾ ਯਤਨ ਕੀਤਾ ਅਤੇ ਬਾਅਦ ਵਿੱਚ ਫਾਇਰ ਬ੍ਰਿਗੇਡ ਦੀ ਗੱਡੀ ਨੇ ਦੋ ਘੰਟਿਆਂ ਦੀ ਮੁਸ਼ੱਕਤ ਨਾਲ ਅੱਗ ਤੇ ਕਾਬੂ ਪਾਇਆ। ਪਿੰਡ ਦੇ ਨੰਬਰਦਾਰ ਕੁਲਜੀਤ ਸਿੰਘ ਅਤੇ ਅਮਰੀਕ ਸਿੰਘ ਨੇ ਦੱਸਿਆ ਕਿ ਮਜ਼ਦੂਰ ਪਰਿਵਾਰਾਂ ਦਾ ਭਾਰੀ ਨੁਕਸਾਨ ਹੋ ਗਿਆ ਹੈ। ਉਨ੍ਹਾਂ ਸਰਕਾਰ ਤੋਂ ਮਜ਼ਦੂਰ ਪਰਿਵਾਰਾਂ ਨੂੰ ਮੁਆਵਜ਼ਾ ਦੇਣ ਦੀ ਮੰਗ ਕੀਤੀ।ਇਸੇ ਤਰ੍ਹਾਂ ਪਿੰਡ ਰਾਮਪੁਰਾ ਵਿਖੇ ਕਿਸਾਨ ਭੁਪਿੰਦਰ ਸਿੰਘ ਦੇ ਵਰਾਂਡੇ ਵਿੱਚ ਪਈ 5 ਟਰਾਲੀਆਂ ਦੀ ਤੂੜੀ ਸੜ ਗਈ ਅਤੇ ਮਜ਼ਦੂਰ ਹਰਬੰਸ ਸਿੰਘ ਦਾ ਤੂੜੀ ਦਾ ਕੁੱਪ ਸੜ ਗਿਆ।