Asian Games: ਸ਼ਾਟਪੁੱਟ ਖਿਡਾਰਨ ਮਨਪ੍ਰੀਤ ਕੌਰ ਨੇ ਜਿੱਤਿਆ ਕਾਂਸੀ ਦਾ ਤਗਮਾ
ਘੋੜਸਵਾਰੀ ਦੇ ਡਰੈਸਾਜ ਟੀਮ ਮੁਕਾਬਲੇ ਵਿੱਚ ਭਾਰਤ ਚੌਥੇ ਸਥਾਨ 'ਤੇ
ਭਾਰਤ ਦੀ ਮਨਪ੍ਰੀਤ ਕੌਰ ਨੇ ਏਸ਼ਿਆਈ ਖੇਡਾਂ ਵਿੱਚ ਮਹਿਲਾ ਸ਼ਾਟਪੁੱਟ ਮੁਕਾਬਲੇ ਦੌਰਾਨ 17.17 ਮੀਟਰ ਦੇ ਯਤਨ ਨਾਲ ਕਾਂਸੀ ਦਾ ਤਗਮਾ ਜਿੱਤਿਆ। ਉੱਥੇ ਹੀ ਸੋਨ ਤਗਮਾ ਚੀਨ ਦੀ ਸੋਂਗ ਜਿਆਯੂਆਨ (19.40 ਮੀਟਰ) ਅਤੇ ਚਾਂਦੀ ਦਾ ਤਗਮਾ ਝਾਂਗ ਲਿਨਰੂ (18.14 ਮੀਟਰ) ਨੇ ਆਪਣੇ ਨਾਮ ਕੀਤਾ।
36 ਸਾਲਾ ਇਸ ਖਿਡਾਰਨ ਦਾ ਪਿਛਲਾ ਸਰਵੋਤਮ ਪ੍ਰਦਰਸ਼ਨ ਵੀ 2023 ਏਸ਼ਿਆਈ ਚੈਂਪੀਅਨਸ਼ਿਪ ਵਿੱਚ ਕਾਂਸੀ ਦਾ ਤਗਮਾ ਹੀ ਸੀ। ਜਦਕਿ ਪਿਛਲੇ ਮਹੀਨੇ ਗਲਾਸਗੋ ਵਿੱਚ ਰਾਸ਼ਟਰਮੰਡਲ ਖੇਡਾਂ ਦੌਰਾਨ 17.49 ਮੀਟਰ ਦੇ ਯਤਨ ਨਾਲ ਉਹ ਚੌਥੇ ਸਥਾਨ 'ਤੇ ਰਹੀ ਸੀ।
ਘੋੜਸਵਾਰੀ ਦੇ ਡਰੈਸਾਜ ਟੀਮ ਮੁਕਾਬਲੇ ਵਿੱਚ ਭਾਰਤ ਚੌਥੇ ਸਥਾਨ 'ਤੇ
ਭਾਰਤ ਸ਼ੁੱਕਰਵਾਰ ਏਸ਼ਿਆਈ ਖੇਡਾਂ ਦੇ ਘੋੜਸਵਾਰੀ ਦੇ ਡਰੈਸਾਜ ਟੀਮ ਮੁਕਾਬਲੇ ਵਿੱਚ 201.971 ਅੰਕਾਂ ਦੇ ਕੁੱਲ ਸਕੋਰ ਨਾਲ ਚੌਥੇ ਸਥਾਨ 'ਤੇ ਰਹਿ ਕੇ ਤਗਮਾ ਜਿੱਤਣ ਤੋਂ ਖੁੰਝ ਗਿਆ। ਚੀਨ ਨੇ 208.148 ਅੰਕਾਂ ਨਾਲ ਸੋਨ ਤਗਮਾ ਜਿੱਤਿਆ। ਉਸ ਤੋਂ ਬਾਅਦ ਦੱਖਣੀ ਕੋਰੀਆ ਨੇ 205.265 ਅੰਕਾਂ ਨਾਲ ਚਾਂਦੀ ਅਤੇ ਜਾਪਾਨ ਨੇ 204.117 ਅੰਕਾਂ ਨਾਲ ਕਾਂਸੀ ਦਾ ਤਗਮਾ ਜਿੱਤਿਆ। ਭਾਰਤ ਕਾਂਸੀ ਤਗਮਾ ਜੇਤੂ ਜਾਪਾਨ ਤੋਂ ਮਹਿਜ਼ 2.146 ਅੰਕ ਪਿੱਛੇ ਰਿਹਾ।
ਹਿਰਦੇ ਵਿਪੁਲ ਛੇੜਾ ਨੇ 2007 ਵਿੱਚ ਜਨਮੇ 'ਬੇ ਓਲਡਨਬਰਗ' ਘੋੜੇ ਡੋਨੋ ਡੀ ਮਾਗੀਓ ਦੀ ਸਵਾਰੀ ਕਰਦਿਆਂ 67.353 ਅੰਕ ਹਾਸਲ ਕੀਤੇ। ਉੱਥੇ ਹੀ ਸ਼ਰੂਤੀ ਵੋਰਾ ਨੇ 2012 ਵਿੱਚ ਜਨਮੇ 'ਓਲਡਨਬਰਗ' ਘੋੜੇ ਮੈਗਨੈਨੀਮਸ ਦੀ ਸਵਾਰੀ ਕਰਦਿਆਂ 68.059 ਅੰਕ ਹਾਸਲ ਕਰਕੇ ਭਾਰਤ ਦਾ ਸਰਵੋਤਮ ਸਕੋਰ ਬਣਾਇਆ। ਜਦਕਿ ਜੈ ਸੂਦ ਨੇ 2011 ਵਿੱਚ ਜਨਮੇ ਘੋੜੇ ਗੂਫੀ ਲਾ ਪਰਲੇ 'ਤੇ ਸਵਾਰ ਹੋ ਕੇ 66.559 ਅੰਕ ਹਾਸਲ ਕੀਤੇ। ਇਨ੍ਹਾਂ ਤਿੰਨਾਂ ਦੇ ਸਕੋਰ ਨੂੰ ਮਿਲਾ ਕੇ ਭਾਰਤ ਦੇ 201.971 ਅੰਕ ਹੋਏ, ਜਿਸ ਨਾਲ ਟੀਮ ਤਗਮੇ ਵਾਲੇ ਸਥਾਨ ਤੋਂ ਠੀਕ ਪਿੱਛੇ ਰਹੀ।
