US Iran War Ceasefire: ਇਰਾਨ ਵਿੱਚ ਜੰਗ ਰੋਕਣ ਲਈ ਹੋਇਆ ਜੰਗਬੰਦੀ ਦਾ ਸਮਝੌਤਾ ਬੁੱਧਵਾਰ ਨੂੰ ਖ਼ਤਰੇ ਵਿੱਚ ਨਜ਼ਰ ਆਇਆ, ਕਿਉਂਕਿ ਇਸਲਾਮਿਕ ਗਣਰਾਜ ਨੇ ਲਿਬਨਾਨ ਵਿੱਚ ਇਜ਼ਰਾਈਲੀ ਹਮਲਿਆਂ ਦੇ ਜਵਾਬ ਵਿੱਚ ਹੋਰਮੂਜ਼ ਜਲਡਮਰੂ (Strait of Hormuz) ਨੂੰ ਦੁਬਾਰਾ ਬੰਦ ਕਰ ਦਿੱਤਾ ਹੈ। ਵ੍ਹਾਈਟ ਹਾਊਸ ਨੇ ਇਸ ਜਲ ਮਾਰਗ ਨੂੰ ਮੁੜ ਖੋਲ੍ਹਣ ਦੀ ਮੰਗ ਕੀਤੀ ਅਤੇ ਸ਼ਾਂਤੀ ਵਾਰਤਾ ਨੂੰ ਪਟੜੀ 'ਤੇ ਰੱਖਣ ਦੀ ਕੋਸ਼ਿਸ਼ ਕੀਤੀ।
ਅਮਰੀਕਾ ਅਤੇ ਇਰਾਨ ਦੋਵਾਂ ਨੇ ਸਮਝੌਤੇ 'ਤੇ ਪਹੁੰਚਣ ਤੋਂ ਬਾਅਦ ਆਪਣੀ ਜਿੱਤ ਦਾ ਦਾਅਵਾ ਕੀਤਾ ਅਤੇ ਵਿਸ਼ਵ ਨੇਤਾਵਾਂ ਨੇ ਰਾਹਤ ਮਹਿਸੂਸ ਕੀਤੀ, ਭਾਵੇਂ ਕਿ ਇਰਾਨ ਅਤੇ ਖਾੜੀ ਅਰਬ ਦੇਸ਼ਾਂ 'ਤੇ ਹੋਰ ਡਰੋਨ ਅਤੇ ਮਿਜ਼ਾਈਲਾਂ ਹਮਲੇ ਹੋਏ।
ਇਸ ਦੇ ਨਾਲ ਹੀ ਇਜ਼ਰਾਈਲ ਨੇ ਲਿਬਨਾਨ ਵਿੱਚ ਹਿਜ਼ਬੁੱਲਾ ਅਤਿਵਾਦੀ ਸਮੂਹ 'ਤੇ ਆਪਣੇ ਹਮਲੇ ਤੇਜ਼ ਕਰ ਦਿੱਤੇ ਹਨ, ਜਿਸ ਵਿੱਚ ਬੈਰੂਤ ਦੇ ਵਪਾਰਕ ਅਤੇ ਰਿਹਾਇਸ਼ੀ ਇਲਾਕਿਆਂ ਨੂੰ ਨਿਸ਼ਾਨਾ ਬਣਾਇਆ ਗਿਆ ਹੈ; ਬੁੱਧਵਾਰ ਨੂੰ ਉੱਥੇ ਹੋਈ ਸਭ ਤੋਂ ਭਿਆਨਕ ਲੜਾਈ ਵਿੱਚ ਘੱਟੋ-ਘੱਟ 182 ਲੋਕ ਮਾਰੇ ਗਏ ਸਨ। ਇਸ ਤਾਜ਼ਾ ਹਿੰਸਾ ਨੇ ਉਸ ਸਮਝੌਤੇ ਨੂੰ ਤਾਰਪੀਡੋ ਕਰਨ ਦੀ ਧਮਕੀ ਦਿੱਤੀ ਹੈ ਜਿਸ ਨੂੰ ਅਮਰੀਕੀ ਉਪ ਰਾਸ਼ਟਰਪਤੀ ਜੇ.ਡੀ. ਵਾਂਸ ਨੇ ਇੱਕ "ਨਾਜ਼ੁਕ" ਸੌਦਾ ਕਿਹਾ ਸੀ।
ਇਰਾਨ ਦੀ ਸੰਸਦ ਦੇ ਸਪੀਕਰ ਮੁਹੰਮਦ ਬਘੇਰ ਘਾਲੀਬਾਫ ਨੇ ਕਿਹਾ ਕਿ ਯੋਜਨਾਬੱਧ ਗੱਲਬਾਤ "ਗੈਰ-ਵਾਜਬ" ਹੈ ਕਿਉਂਕਿ ਵਾਸ਼ਿੰਗਟਨ ਨੇ ਲੜਾਈ ਖ਼ਤਮ ਕਰਨ ਲਈ ਤਦਿਰਾਨ ਦੀਆਂ 10 ਸ਼ਰਤਾਂ ਵਿੱਚੋਂ ਤਿੰਨ ਨੂੰ ਤੋੜ ਦਿੱਤਾ ਹੈ। ਇਰਾਨ ਦੇ ਵਿਦੇਸ਼ ਮੰਤਰੀ ਅੱਬਾਸ ਅਰਾਗਚੀ ਨੇ ਜ਼ੋਰ ਦੇ ਕੇ ਕਿਹਾ ਕਿ ਲਿਬਨਾਨ ਵਿੱਚ ਜੰਗ ਦਾ ਖਾਤਮਾ ਜੰਗਬੰਦੀ ਸੌਦੇ ਦਾ ਹਿੱਸਾ ਸੀ, ਪਰ ਇਜ਼ਰਾਈਲੀ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਅਤੇ ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਕਿਹਾ ਕਿ ਇਹ ਜੰਗਬੰਦੀ ਲਿਬਨਾਨ 'ਤੇ ਲਾਗੂ ਨਹੀਂ ਹੁੰਦੀ। ਇਸ ਦੌਰਾਨ ਇਜ਼ਰਾਇਲ ਨੇ ਲਿਬਨਾਨ ਵਿੱਚ 10 ਮਿੰਟਾਂ ਦੇ ਅੰਦਰ 100 ਤੋਂ ਵੱਧ ਟੀਚਿਆਂ 'ਤੇ ਹਮਲੇ ਕੀਤੇ, ਜਦੋਂ ਕਿ ਹਿਜ਼ਬੁੱਲਾ ਨੇ ਵੀਰਵਾਰ ਸਵੇਰੇ ਉੱਤਰੀ ਇਜ਼ਰਾਈਲ 'ਤੇ ਰਾਕੇਟ ਦਾਗਣ ਦੀ ਪੁਸ਼ਟੀ ਕੀਤੀ ਅਤੇ ਕਿਹਾ ਕਿ ਉਹ ਇਜ਼ਰਾਈਲੀ-ਅਮਰੀਕੀ ਹਮਲੇ ਰੁਕਣ ਤੱਕ ਅਜਿਹਾ ਕਰਨਾ ਜਾਰੀ ਰੱਖਣਗੇ।
ਹਿਜ਼ਬੁੱਲਾ ਮੁਖੀ ਨਈਮ ਕਾਸਿਮ ਦਾ ਭਤੀਜਾ ਹਲਾਕ : ਇਜ਼ਰਾਇਲੀ ਫੌਜ
April 9, 2026 2:01 pm
ਇਜ਼ਰਾਈਲ ਨੇ ਵੀਰਵਾਰ ਨੂੰ ਕਿਹਾ ਕਿ ਉਸ ਨੇ ਬੀਤੀ ਰਾਤ ਬੇਰੂਤ ਵਿੱਚ ਕੀਤੇ ਇੱਕ ਹਮਲੇ ਦੌਰਾਨ ਇਰਾਨ ਸਮਰਥਿਤ ਲੇਬਨਾਨੀ ਸਮੂਹ ਹਿਜ਼ਬੁੱਲਾ ਦੇ ਆਗੂ ਨਈਮ ਕਾਸਿਮ ਦੇ ਭਤੀਜੇ ਨੂੰ ਮਾਰ ਦਿੱਤਾ ਹੈ। ਇਜ਼ਰਾਇਲੀ ਸੁਰੱਖਿਆ ਬਲਾਂ ਨੇ ਕਿਹਾ ਕਿ ਉਨ੍ਹਾਂ ਨੇ ਬੇਰੂਤ ਇਲਾਕੇ ਵਿੱਚ ਹਮਲਾ ਕੀਤਾ ਅਤੇ ਹਿਜ਼ਬੁੱਲਾ ਦੇ ਜਨਰਲ ਸਕੱਤਰ ਨਈਮ ਕਾਸਿਮ ਦੇ ਨਿੱਜੀ ਸਕੱਤਰ ਅਤੇ ਭਤੀਜੇ ਅਲੀ ਯੂਸਫ ਹਰਸ਼ੀ ਨੂੰ ਖਤਮ ਕਰ ਦਿੱਤਾ। (ਰਾਇਟਰਜ਼)
ਜੰਗ ਮੁੜ ਛਿੜੀ ਤਾਂ ਯੂਰਪੀ ਸੰਘ (EU) ਆਪਣੇ ਬਜਟ ਨਾਲ ਸਬੰਧਤ ਨਿਯਮਾਂ 'ਤੇ ਰੋਕ ਲਗਾਵੇ : ਇਟਲੀ
April 9, 2026 2:01 pm
ਇਟਲੀ ਦੀ ਪ੍ਰਧਾਨ ਮੰਤਰੀ ਜੌਰਜੀਆ ਮੇਲੋਨੀ ਨੇ ਵੀਰਵਾਰ ਨੂੰ ਸੰਸਦ ਵਿੱਚ ਕਿਹਾ ਕਿ ਜੇਕਰ ਇਰਾਨ ਵਿਰੁੱਧ ਅਮਰੀਕਾ-ਇਜ਼ਰਾਈਲ ਦੀ ਜੰਗ ਮੁੜ ਛਿੜਦੀ ਹੈ ਤਾਂ ਯੂਰਪੀ ਸੰਘ ਦੇ ਅਧਿਕਾਰੀਆਂ ਨੂੰ ਬਜਟ ਘਾਟੇ ਨਾਲ ਸਬੰਧਤ ਨਿਯਮਾਂ ਨੂੰ ਕੁਝ ਸਮੇਂ ਲਈ ਰੋਕਣ ਬਾਰੇ ਸੋਚਣਾ ਚਾਹੀਦਾ ਹੈ। ਮੇਲੋਨੀ ਨੇ ਇਹ ਵੀ ਦੱਸਿਆ ਕਿ ਉਨ੍ਹਾਂ ਦੀ ਸਰਕਾਰ ਬਿਜਲੀ ਅਤੇ ਤੇਲ ਵਰਗੀ ਊਰਜਾ ਦੀਆਂ ਕੀਮਤਾਂ ਵਿੱਚ ਹੋਣ ਵਾਲੀ ਨਾਜਾਇਜ਼ ਸੱਟੇਬਾਜ਼ੀ ਨੂੰ ਰੋਕਣ ਲਈ ਹਰ ਜ਼ਰੂਰੀ ਕਦਮ ਚੁੱਕਣ ਲਈ ਤਿਆਰ ਹੈ, ਜਿਸ ਵਿੱਚ ਊਰਜਾ ਕੰਪਨੀਆਂ 'ਤੇ ਵਿੰਡਫਾਲ ਟੈਕਸ (ਵਾਧੂ ਮੁਨਾਫ਼ੇ 'ਤੇ ਟੈਕਸ) ਲਗਾਉਣਾ ਵੀ ਸ਼ਾਮਲ ਹੈ। (ਰਾਇਟਰਜ਼)
